Footer

Terorismo

Kolum : Sinursuran

Ni Jobert M. Pacnis

  (Maikadua a paset)

 

Saan laeng a ti kaadu ti naipatli/naibuis a biag ti isyo iti bunga dagiti terorismo nga aramid.  Wenno iti kadakkel ti kantidad ti nadadael a sanikua. Ketdi, iti direkta nga epektona iti sistema ti politika, ekonomia ken iti sosiedad.

Malagip nga iti kallabes, imparuar dagiti lumaud a pagilian ti panangballaagda kadagiti umilida ti kinapeligro dagiti pagilian nga adda iti pangta dagiti terorista. Nagangayanna, nagbalin daytoy a pilkat iti imahe dagiti nairaman a pagilian.

Malaksid kadayta, ti terorismo nga aramid, mabalin a mangyeg iti panagduadua dagiti umili iti kinatalgedda; panagsuek ti iseserrek dagiti mayat nga agnegosio iti maysa a pagilian; panagpababa ti mapastrek iti benneg ti turismo; pannakaitantan ti panagbiahe iti uneg ken ruar ti pagilian; pannakasayang dagiti kuarta a pangipatakder manen kadagiti nadadael; pannakaipadakkel ti pondo ti militar tapno masalaknibanna dagiti umili a daytoy koma ket maited iti kasapulan iti benneg ti edukasion ken salun-at; ken ti ingangato ti paranoia (di maiparbeng a panagbuteng, pannakaburibor ken panagsuspetsa) iti gobierno ken kadagiti umili.

Dakkel a mangimameg iti maysa a pagilian dagitoy a bunga ti terorismo. Mabalin pay nga isu ti pakaidaramudomanna ket gundawayan dagiti nabibileg a mangrienda itoy. Aramidendan ti kaykayatda.

Nawayanto payen dagiti makunkuna a TNC (trans-national corporation) a manipolaren ti gobierno ta isudanton ti adda iti likudan dagitoy a terorista. Awanen ti pagturongan ti pagilian no kasta.

Maysa laeng a buya dayta a di adayo a mapasamak. Ket dayta ti bambantayan ti tunggal nasion tapno makaliklikda itoy. Ta oras a mapasamak daytoy, awanen ti talna ken kappia a namnamnamen dagiti agindeg. Kanigid-kanawan la ketdi ti kinadakes.

Daytoy ti nakapanunotan ti U.S. tapno buklenna ti addang a mangpungtil iti sara dagitoy a terorista. Adda dita nga inrusatna ti coalition of the willing—‘tay panagtitipkel dagiti pagilian a manglaban iti Iraq iti panangidaulo idi ni Saddam Hussein.

Ad-adda a timmibker daytoy a grupo idi panawen ti War of Agression idi rebbekenen dagitoy a pagilian ti Iraq. Malagip a kimmappeng met ti pagiliantayo kadaytoy a grupo ngem nagsanud met laeng idi kinemmeg dagiti Iraqi ti maysa a Pinoy a mangmangged sadiay pagilianda ket sa la mawayawayaan daytoy no agawiden ti tropa ti Pilipinas a karaman kadagiti kalabanda. Sinilmutan daytoy a pasamak ti igugura ti Amerika iti pagiliantayo.

Pagsayaatanna, naagasan daydi a sugat ket mayat manen ti panagkayammet ti pagiliantayo ken ti Amerika.

Agtultuloy latta ngarud dagiti addang dagiti nadumaduma a pagilian tapno malapdanda dagiti terorista iti kinadakes a pangpanggependa.

Ngem ti nasakit ita a mapaspasamak, kakabsattayo met laeng a Pilipino ti mangyeyeg ita iti panagbuteng, panagdandanag kadagiti kailiantayo sadiay siudad ti Zamboanga. No pagpatinggaan daytoy a pasamak, awan ti makaammo. Agingga nga adda latta dagiti kakabsat a mangiruprupir iti ibagbagada a kalinteganda (wenno bukod a gagem dagiti adda iti likudanda?), dinto agsarday daytoy a pasamak. Paseten iti istruktura a sursuroten ti tunggal pagilian dagiti riribuk a mapaspasamak.

Nupay kasta, dinto met agsarday dagiti addang a mangpungtil kadagiti dakes nga aramid. Ngarud, masapul ti panagkakayammet tapno ti latta kinaimbag ti agari. Makipaset ti tunggal maysa nupay kasano kinanumona.

Iti met gobierno, maaddaan koma iti napintek/pulido nga addang a makibakal kadagiti agpangpanggep a mangriribuk iti pagilian. Kabaelan daytoy no la ketdi maiserbi iti husto dagiti pondo a saan ket nga iti bulsa dagiti managsida iti “pork.”#

Comments are closed.