Footer

Lote iti amianan ti kapitolio, panggep a gatangen ti provincial government

VIGAN CITY – Interesado ti gobierno probinsial a gatangen ti lote iti amiananen ti kapitolio, daytoy ti impalgak ni Gov. Luis Ryan Singson itay nabiit.

Kinuna ti gobernador a no magatang ti provincial government ti nasao a lote, agbalin a pagparkingan dagiti kukua ti probinsia a luglugan iti panagreretira iti malem.

Iti agdama ket up-upaan ti city government ti lote manipud iti Land Bank of the Philippines nga isu ti akinkukua iti daytoy.

Ditoy ti pagparkingan dagiti van nga agpaspasada manipud  ditoy siudad nga agpaabagatan ket adda baybayadanda a parking fee.

Kinuna ni Singson a no magatang ti gobierno probinsial ti nasao a lote, maipan amin  dagiti lugan ditoy tapno malapdan ti pannakaaramatda a pagluganan kalpasan  ti office hours.

Iti kallabes, adda dagiti pammabalaw a naibato kadagiti agig-iggem kadagiti lugan ti gobierno probinsial agsipud iti mapapati a pannakaaramat dagitoy iti ipapan pannakitienda, panagitulod iti ubbingda iti pagadalan, ken dadduma pay.#

Comments are closed.