Footer

Sweetener, no sobra, maidalitka

Saanen a kabarbaro a banag ti sweetener ta addan dagitoy nga instant a pagpasam-it wenno kasukat ti asukar. Nabayagen a natakuatanda ken maus-sar, kas iti saccharin nga immuna a natakuatan idi 1878 ken nasamsam-it nga adayo ngem ti asukar iti mamintallogasut a beses. Uray bassit laeng ti ikabil ket mapataudnan ti kapkapnekan a raman iti timplaen a taraon wenno mainum.

Ti Neotame ti kasasam-itan iti amin nga artificial sweeteners. Daytoy ti kabaruanan a maus-usar iti agdama iti panagproseso kadagiti mailaklako a taraon a mainum ken dagiti makan, kas kadagiti low carbohydrates a tinapay, kadagiti sopdrink ken concentrated a mainum a pagpalamiis lalona kadagiti saanen a nasken nga asukaran.

Kadagiti naduyos unay nga agkape kadagiti establisimiento-negosio, kanayonen dayta a sweetener iti inorder—naipaketen iti babassit. Kadagiti instant coffee a three in one ket nalaokan wenno sweetener ti ilalaokda. Uray kadagiti mailaklako a nagduduma a pagpalamiis-palamig iti bangketa.

Iti USA ket inaprobaranda ti panagaramat sweetener ta low carbohydrates. Awan pay ketdi kadagiti dadduma a sweetener.

Kastoy man ti palawag ti healthaliciousness.com, “Carbohydrates are found in almost all living things and play a critical role in the proper functioning of the immune system, fertilization, pathogenesis, blood clotting, and human development. A deficiency of carbohydrates can lead impaired functioning of all these systems, however, in the Western world, deficiency is rare. Excessive consumption of carbohydrates, especially refined carbohydrates like sugar or corn syrup, can lead to obesity, type II diabetes, and cancer.

Ti sobra kano a panagusar iti asukar wenno corn syrup a lumukmeg ti tao, agsakit iti type II diabetes ken cancer.

Ti kinakisang ti magatang nga asukar iti merkado a pagtempla ti rason a natakuatan dagitoy a sweetener. Kas ti saccharin,  nadiskubre gapu iti kinakisang ti magatang nga asukar a bunga ti Umuna a Gubat Sangalubongan. Sipud idin, agtultuloy ti panagtakuat kadagiti substitute a pagpasam-it.

Iti pagilian, ti agtultuloy a panagngato ti presio ti asukar iti rason iti panagsapul iti substitute. Saan a maliklikan a tapogan dagiti agar-aramat itoy iti dakkel a volume iti inaldaw  yantangay ta aprobadoda met iti Food and Drugs Administration kadagiti sabsabali a nation, lalo ket nalaklakada nga adayo ngem ti asukar.

Dagita dagiti rason no apay a nasken ti panagusar kadagitoy nga artificial sweeteners.

Ti kuestion ita, ania ngarud ti pagdaksanna dagitoy nga artificial sugar ken sweetener no addaanda met iti pammalubos iti panagusar?

Iti panagadal ti Yale University kadagitoy a sweetener, napaneknekan dagiti nagsukisok a daytoy ti mangipapaay iti nadaras a panaglukmeg ken idadagsen. Obesity ken overweight a kunada.

Segun kadagitoy a nagsukisok, no nangipaunegtayon iti taraon, agtignay met a dagus ti utek a mangawat kadagitoy a sustansia. Ta dayta ngarud ti proseso iti bagi. Ngem ti imasna, saan a napudpudno a taraon dagitoy ta artificial la ngarud. Iti pannakatakuat ti utek a saan gayam a pudno a taraon ti impauneg, saanna nga awaten dagitoy. Saanna nga iproseso. Saan a maallilaw ti utek. Isublina dagita, kakaasin ni dalem a mangawat manen kadagita, ket agsipud ta saan nga awaten ti utek, itambakna lattan iti laongna, maurnong a maurnong dagita agingga a magaburanen. Daytan ti pagpeggadan ti tao.\

Dagiti nalukmeg ken nadagsen isuda met ti nalaka a kapten dagiti sakit a kas iti Stage 2 diabetes, cardiovascular disease, high blood pressure ken sakit iti dalem, dagiti kangrunaan a sakit a sagsagabaen iti agdama a panawen.

Iti lubong, ti kinalukmeg ken kinadagsen ti maikalima a kaaduan ti matmatay, kuna ti report ti World Health Organization (WHO). Addaan kano iti 2.8 million a matmatay iti tinawen gapu iti daytoy a rason.

Kasano aya a maammuan no sika ti agsagsagaba iti nalabes a kinalukmeg ken kinadagsen?

Maammuan daytoy babaen ti pananganalisar ti body mass index wenno BMI. Ti tao ket maibilangen nga obese no 20% a nadagdagsen nga amang ngem iti maiyataday a normal a timbangna iti edadna ken tayagna.

Iti survey a napasamak idi 2011 nga inaramid ti Food and Nutrition Research Institute (FNRI), natakuatanda nga addan 22.3% a sobra a timbangda ken addan 6.1% dagiti maawaganen iti obese. Iti pattapattada, umadu pay ti bilang dagitoy iti panagtulid ti tawen.

Ti kangrunaan unay a saan a nasayaat a marikrikna ket ti saan a pannakabsog, kuna dagiti nagsukisok. Daytoy ti epekto dagiti sweeteners kadagiti makan ken mainum a taraon. Ket gapu ta di mabsog, uray no nabundat la ngaruden ti buksit gapu iti kinaadu ti kinnan ken ininum, mangan ken uminum latta pay iti ad-adu. Iti dayta a wagas no apay nga adu dagiti nalulukmeg ken nadadagsen.

Kadagiti nalulukmeg ken nadadagsen ti kangrunaan nga agsagaba kadagiti sakit a kas iti diabetes type 2, sakit ti puso, sakit iti dalem ken high blood pressure.

Iti dayta a rason nga impila ni 1st district Davao del Norte Rep. Anthony del Rosario iti House Bill # 69 a mangi-darirag iti healthy lifestyle; panagplano, panangdebelop ken panangimplementar iti national program para iti promosion ken suporta kadagiti aktibidad a maka-tulong para iti healthy lifestyle.#

Comments are closed.