Footer

Babai a nagtakaw, di nakalusot kadagiti tindera

VIGAN CITY – Uray ti Baluarte sadiay Barangay Salindeg ditoy siudad a nakaipasdekan dagiti babassit a paglakuan iti paraangan ti pagtaengan ni dati a Gov. Luis “Chavit” Singso ket saanen a pakawanen dagiti mannibrong a pagtakawan.

Sakbayna, nakaawat iti tawag iti selpon ni Police Supt. Maximo Almachar Taclas, OIC ti Vigan City police station nga adda natiliw a babai a mannanakaw iti mismo a sungadan ti pagtaengan ni Singson  a nakaipasdekan dagiti babassit nga stalls nga aglaklako kadagiti souvenir t-shirts ken dadduma pay nga aruaten.

Dagus a nagturong da SPO1 Allan Reoliquio ken PO1 Lawrence De Vera Forges ket idi nakadanonda iti Baluarte, impaima kadakuada ni Patrina Artajos y Arruejo, 19, naasawaan, saleslady ti Lumen’s Souvenir Shop a kukua ni Iluminada Tapaya Amoroso a masarakan iti compound ti Baluarte ti suspek a maysa nga Elizabeth Tenorio Afroilan, 27, naasawaan, ken residente iti Barangay Tay-ac, Bantay, Ilocos Sur.

Segun iti panagimbestiga dagiti polis, idi agarup 4:30 ti malem ti nadakamat a petsa, nakita ni Artajos ti suspek iti uneg ti puestona a nagpammarang nga adda gatangen na.

Mapapati nga idi nakaliway ti biktima, pinorsar ni Tenorio a linuktan ti kabinet ket innalana ti bag a naglaon iti P800.00 sa timmaray a naglibas.

Nagpaarayat ni Artajos kadagiti padana a tindera ket kinamatda ti suspek agingga iti naipiskotda.

Naipan ti suspek iti police station para iti pannakaimbestigana ken umisu a disposion.

Ngem saanen a narekobre ni Artajos ti bagna ken ti kuartana a mapapati nga inlibas nga inyawat ni Tenorio iti kakumplotna.

Iti pannakaisurat daytoy, naiyendorson iti City Prosecutor’s Office, Vigan City ti kaso a robbery maikontra ken ni Tenorio ket nai-docket daytoy iti babaen ti NPS Nr. I-14-INQ-13J-00141

Kabayatanna, natakaw ti bag ti maysa a tindera iti uneg ti puestona a mapapati a sinikuat ti maysa a nagpamma-rang a kustomer.

Nagpulong iti polis ni Janet Rivera y Acosta, 36, naasawaan, tindera, ken residente iti Barangay Poblacion Este, ditoy nga ili, a natakaw ti bagna a naglaon iti Samsung Galaxy tab, Nokia and Samsung cell phones, jewelries, Philippine passport, resresibo ken kuarta nga agdagup iti sumurok kumurang P40,000.00.

Segun iti biktima, imbatina ti bagna iti kayo a tugaw iti uneg ti puestona iti vegetable section ti tiendaan ket inasikasona ti maysa a kustomer.

Naduktalan laengen ni Rivera nga awanen ti bagna idi makapanaw ti kustomerna.

Maysa a  butcher ti nangibaga iti polis a nakitana ti maysa a lalaki a nagaruat iti amarilio a jersey ken  maroon  a diaket iti puesto ket daytoy ti masuspetsa a nangala iti bag ni Ricera.

Sinapul dagiti polis ti suspek ngem saandan a nabirokan.#.#

 

Comments are closed.