Footer

Bay-am Man Pay la ‘Ta Nagngina a Gatas, ‘Mare!

Salaysay ni: Judith M. Simon

(Umuna a paset)

BREASTMILK is best for babies up to 2 years old!

Nalabit saanen a ganggannaet kenka dayta,’Mare. Naynay a makitkita daytoy kadagiti komersial dagiti agkakangina a gatas a mailaklako ita iti merkado. Kanigid-kanawan. Naitapkal pay dayta a pakaammo kadagiti produkto.

Ngem ti ‘yanna nga imas, ‘Mare, agtultuloy met latta ti panagadu dagiti aggatang iti komersialisado a gatas a para ubbing nupay kasano ti panangikampania ti gobierno a nasaysayaat pay laeng nga amang ti gatas ti ina a taraon ni beybi.

Kastatayon sa a talaga, ‘Mare. No ania ti good, isu ti ipapaaweng; no ania ti bad, isu ti aramiden.

Ala, mabalin nga adda rason ti tunggal maysa no apay a kaykayatna a pakanen/taraonan iti komersialisado a gatas ti anakna imbes nga iti gatas a mismo nga agtaud kenkuana.

Umuna ditoyen ti kaawan panawen ti maysa nga ina. Mabalin nga adda napateg a trabaho nga asikasuenna ket saanna a kabalinan a maited ti kasapulan ni Beybi a gatas iti oras a kasapulan daytoy.

Ngem puera delos buenos, ‘Mare, adu ti madi gapu ta madadael kano ti pigurada no agpasusoda. Ta baka isukat kano ni lakayda no aglanglangadan a losiang.

Makakatawaak man kadayta a panagpampanunot dagiti dadduma, ‘Mare. Saanka met siguro a maysa kadakuada, di kadi?

Maysa pay, mabalin a nakiddit ti tubbog nga agtaud iti ina. Adda dagiti kastoy a kaso. Adda dita ti ayatda a mangited iti umisu a taraon iti anakda, ‘Mare, ngem anian, aya, ta naipaidam man kadakuada dayta a banag. Isu a tapno saan nga agbisin ni beybi, adda dita a kamanganda dagiti komersialisado a gatas.

Mainaig itoy a banag, ‘Mare, adda pamuspusan dagiti nataengan. Diak la masinunuo no adda klinikal a pagbasaran daytoy. No kano nakiddit ti gatas ti ina, mangituno laeng iti lasona ket daytoy ti yilut-ilut iti aglawlaw ti suso kalpasan ti panagpasngay. Presto kano, agpussuak a kasla ubbog ti gatas a taraon ni beybi.

Pinadasko met idi dayta, ‘Mare. Idi ngamin ipasngayko ti maikadua a bungami ken ni lakay, sangit a sangit ni beybi idi duan nga aldawna. Bassit gayam ti makunnotna a gatas. Panggepmi idin nga agallakay a mapanak agpakita iti doktor ta kaasi met ni beybi Ngem kinuna ti ikit ni lakay a mangitunoak iti lasona a yilutko iti barukongko. Kamalman dayta a panangaramidko, nakatubtubbog metten.

Ala, awan met ketdi ti dakesna no padasen ti addaan iti kastoy a parikut, di kadi, ‘Mare?

Ngem apay, ‘ya, ‘Mare, a kasta la unayen ti panangikampania ti gobierno ti panangpasuso kada beybi?

Wen, pagaammotayon no ania ti benepisio nga itden ti gatas ti ina iti salun-at ti ubing. Amintayo, ‘Mare, nayad-adalen daytoy idi addatayo pay iti ikub ti eskuela. Ngem ti pagdaksanna, ita ta maseknantayo la unayen, ditay’ met a tungtungpalen.

Maysa nga ehemplo ti “nakaadaltayo ngem saantayo a nakasursuro”? Dinak misuotan, ‘Mare.

Ad-adayo a nasalun-at kano dagiti ubbing a mapaspasuso ngem dagiti agdepdepende lattan iti komersialisado a gatas. Amang a nanamnamsek iti natural a sustansia ti gatas ti ina ngem dagiti naproseso a gatas. Awan pay ti ipaayna a madi nga epekto. Saan pay a makaalerdyi.

(Adda tuloyna)

Comments are closed.