Footer

Disiplina Ti Kasapulan

Kolum : Sinursuran

Ni Jobert M. Pacnis

 

 

MAYSA manen a trahedia ti napasamak iti baybay ti siudad ti Talisay iti probinsia ti Cebu, kailian. Dua a barko ti nagdinnungpar (wenno maysa laeng kadakuada ti dimmungpar). Immabuten iti nasurok a pitopulo  dagiti nasarakanda a bangkay iti nakapasamakan ti trahedia. Nasurok pay nga innem a pulo dagiti mapukpukaw a pasahero a sapsapulen dagiti otoridad.

Iti pakasaritaan ti pagilian, saan laeng nga ita a mapasamak ti kastoy a kita ti trahedia. Ken saan laeng  nga iti pagiliantayo ti pakapaspasamakan ti kastoy.

Kayatna a sawen, idi pay laeng adun a kapadasantayo ti umarngi kadaytoy. Tunggal pannakapasamakna, adda dayta ukritenna a saem, liday ken pulkok kadagiti nagbalin a biktima kasta metten dagiti kailian a makipagrikna la unay itoy a nakaam-ames a pasamak.

Iti met tunggal trahedia, nadumaduma a pakasaritaan ti mayula. Makita latta ditoy ti kinabannuar dagiti dadduma a kailian ta isaldada ti biagda tapno maispal dagiti mabalin pay a maispal. Agtudo met ti tulong kadagiti biktima.

Adda pay dita ti estoria ti milagro. Nupay iti panagkita dagiti biktima, saandan a maispal iti dayta a trahedia, siraragsakdanto laengen ta naliklikanda ti awan duadua nga ipapatay. Ibilangda daytoy a baro a biag kadakuada. Milagro.

Kuldingen daytoy a pasamak ti kinatao ti tunggal maysa. Mabalin a panangkalbit daytoy ti Namarsua iti pannakaliplipattayon Kenkuana gapu kadagiti agduduma a rason. Ngem adda dita nga agnanayon a mangsapsapuyot kadatayo. Adda dita a mangipalpalagip kadagiti pagkurkurangantayo. Kasta ti kinapategtayo Kenkuana.

Tunggal trahedia, adda latta met dayta imbestigasion tapno masinunuo no asino ti akimbasol iti napasamak. Daytoy nga imbestigasion, manamnama a maiwayat nga awan ti sekseknanna, iti kasta, nupay kaskasano, magun-od ti pamilia dagiti biktima ti hustisia iti napasamak kadagiti ipatpategda iti biag. A mangpalag-an met iti riknada a narissingan iti ipatpateg.

Kadagiti imbestigasion, saan a maliklikan ti pinnabasol aglalo no dua nga agsupadi a partido ti adda iti likudan ti nakaam-ames a pagteng. Baginan, ikalukagna.

Ta asino ngamin, aya, ti mangaklon iti nagbasolanna? Kas met laeng, a, kadagiti adda dita ‘yanyo, kailian.

Asinoda?

Sika met. Dagita, ngay, politiko nga adda iti likudan dayta pannakakurob ti baybayyo. Kaano pay nga inaklonda nga isuda ti nangpalugod kadagitoy a ganggannaet tapno bukibokenda dagiti kinabaknangtayo? Dakkel ngamin ti aw-awatenda, kailian. Ayna, makapahayblad, di kadi?

Sublianta ti trahedia iti Cebu, kailian. Mabalin a kunaen a naglawaan ti baybay, kasano koma ita nga agdinnungpar dagiti barko?

Kas iti kalsada, adda met sursuroten dagiti aglaylayag a dana, kailian. Daytoy a “dalan,” masapul a surotenda a situtudio. Ngem no dadduma, dumteng/mapasamak ‘tay mechanical error. Agpalia dagiti ramit a giya dagiti mangiturturong iti barko. Iti kinalawa ti taaw, saandan a masinunuo nga awanda iti liniada. Di met kas iti kalsada a nalaka laeng a maimatangan/madlawan ti kaawanmon iti umisu a dalan. Iti taaw, mangliwengliweng a danum ti masaripatpatam.

Ita, inton agbalaw dagiti “agmanmaneho” iti barko, asidegen ti sabali pay a barko a makadinnungparda. Ket saan a kas karina ti mangkabig iti kanawan wenno kanigid iti manibela tapno makaliklik laeng iti disgrasia. Dayta, kanabraangto laengen ti sumaruno a mangngegan.

Iti pannakasursurat daytoy, addayta manen ti panagtitinnudo dagiti maseknan no asino a talaga ti akimbasol itoy a pagteng. Paimbestigaran kano ti Kabataan Party-list no apay nga agbibiahe pay laeng ti barko a Tomas Aquinas (ti limned kadagiti dua a barko) idinto nag agedaden iti uppat a pulo. Daan kano unayen ket saan koman a napalugodan pay nga agbiahe. Idinto a sigud kano a Sulpicio Lines ti nakadinnungparna.

(Adda tuloyna)