Footer

Lalaki, nakoriente, natay

CAOAYAN, Ilocos Sur – Dika iggaman ta barut ti elektrisidad no nabasa amangan no adda kulislisna ket makorienteka.

Naliwayan daytoy ni Angelito Tenorio y Querubin, 53, naasawaan, ken residente iti Barangay Don Lorenzo Querubin, ditoy nga ili a puon ti nakatayanna idi bigat ti Nobiembre 2.

Segun iti report manipud iti polis ditoy, nagdalus ti biktima iti balayda ken tinarimaanna ti extension wire ngem imbaga ti asawana a ni Dolores nga ipaknina ti barut ta nabbasa iti tudo.

Madamdama, nakangeg ni Dolores iti ikkis manipud iti anakna a babai ket idi rimmuar iti balayda, nakitana ti asawana a naidalutaytay iti daga a nakaiggem iti barut.

Intarayda ti biktima iti Gabriela Silang General Hospital ngem indeklara ti doktor a nangtaming kenkuana a natayen.#

Comments are closed.