Footer

Polis, kinaritna ti padana a polis nga agpinnaltogda

MAGSINGAL, Ilocos Sur -Kasla paset ti pelikula daytoy nga insidente a maysa a polis ti nangkarit iti padana a polis a risutenda ti susikda babaen ti paltog.

Gapu iti daytoy, napilaan iti kaso a grave threat with assault iti opisina iti provincial prosecutor ni SPO1 Niepo Alvarado Tababan, agdama a naka-assigned iti Regional Public Safety Battalion Explosives Ordinance, PRO1, ken residente iti Barangay Napo, ditoy nga ili gapu iti mapapati a panagprobokarna ken panangkaritna ken ni SPO4 Arcadio Viloria nga agpinnaltogda idi malem ti Oktubre 31 sadiay Barangay Napo, ditoy nga ili.

Segun iti inisial nga inbestigasion, adda napasamak a riribuk iti balay ni Luisa Tubon idi agarup 5:00 ti malem ti Oktubre 31, a mapapati a nakainbolbaran ni Tababan a mapapati nga adda iti inpluensia iti arak.

Mapapati a nagbalin nga arogante ti kadua ni Tababan a nainaganan a maysa a Cunno Tubon, kabutbutos a barangay kagawad iti Barangay Napo ket sinukon ti polis sana inyawid.

Segun iti report, kalpasan ti 15 minutos, nagsubli ni Tababan ket simrek iti balay ni Tubon ket mapapati a kinaritna ni SPO4 Arcadio Viloria, bayaw ni Tubon.

Mapapati a naggawid ni Tababan kalpasanna.

Kalpasan ti 30 minutos, nagsubli manen ni Tababan ket mapapati nga inasutna ti paltogna sana kinarit ni Viloria nga agpinnaltogna.

Inreport ni Viloria ti insidente iti police station ket nagresponde dagiti polis. Idi simmangpet dagiti polis, pimmanaw met laeng ni Tababan iti balay ni Tubon.

Kabayatanna, sabali pay a polis ti napilaan iti kaso kalpasan a naipulong a nagballaag ken nagpaputok idi malem ti Oktubre 31 iti met laeng Barangay Napo, ditoy nga ili.

Napilaan iti kaso a grave threat ken alarm and scandal ni POI Frederick Talbo, Jr. ket naidocket daytoy iti babaen ti  NPS No. I-03-INV-13K-00528.  Naipatulod pay iti Opisina ti Ilocos Sur Provincial Internal Affairs Service (PIAS) para iti muto-propio nga inbestigasion.

Nagpulong iti polis da Isabelita Lamceta y Viloria, 48, naasawaan, ken ti anakna a ni Rosabel Viloria Lamceta, 19, awanan asawa, ken agpada a residente iti Barangay Napo, ditoy nga ili, nga idi agarup 10:20 ti rabii ti Oktubre 30, napan iti balayda ti grupo da PO1 Frederick Talbo, Jr., kaduana da Jerry Talbo, Jay-R Tubon ken maysa a lalaki a nabigbig iti birngas a “ Kallang” Tubon, agpapada a residente met laeng iti nasao a barangay ket mapapati a nagsao ni Jerry Talbo iti: “Apay binalbalatongnak metten, kayatmo ta danogek ta rupam?”

Alegasion met ni Mrs. Lamceta nga arogante ni PO1 Talbo ket kinuna daytoy nga “adda maysa a birbirokenmi, kayatmo ta sampolak ti maysa, auntie?” sa nagpaputok iti namitlo iti sanguanan ti adu a tao.#

Comments are closed.