Footer

Salaknibantayo ti Vigan Heritage Village

(Naisurat daytoy nga artikulo ditoy pagiwarnaktayo idi 2003, sangapulo a tawenen ti napalabas. Ngem ipablaakmi manen ta iti baet ti kaundayen dagiti naruros a tawen, kapaliiwan a dagiti napaspasamak idi ket mapaspasamak latta iti agdama;  awan ti ania a nagbaliwanda, no adda man, nagsukat laeng dagiti nagan ken lugar. Kas kuna ti maysa a miron, sumalaysu. Ania ti panagkitam, kaka? Dakayon ti manghusgar iti kinapudno ti kapaliiwanmi)

 

Itay Setiembre 1, pinaayaban ti Sangguniang Panlungsod ti Vigan City ti Bureau of Fire Protection, Metro Vigan Water District, City Engineer’s Office, Philippine National Police ken ti Ilocos Sur Electric Cooperative tapno mangtedda iti pakalawlawagan iti napasamak nga uram iti sungaban ti Vigan Heritage Village.

Idi arintapusen ti Hulio daytoy a tawen, pinadapo ti uram ti maysa a daan a pagtaengan a napagbalin a pagaramidan iti muebles.

Pagyamanan iti kaadda ti firewall ti JTC Superstore ken iti dagus a yaarayat dagiti bumbero ditoy, ti Fortune Tobacco Flue-Curing Corporation, ken dagiti kabangibang nga ili ken probinsia, nadepdep met laeng ti uram.

Daytoy nga uram ti namagkintayeg saan laeng kadagiti city officials no di pay dagiti residente a mangipatpateg iti napnuan pakasaritaan a Vigan Heritage Village. Namak payen no nakaballasiw ti apuy? Sigurado a mapukawen ti Vigan Heritage Village agsipud ta agdidippit ditoy dagiti kadaanan a pagtaengan a naipatakder pay la idi tiempo ti Kastila.

Kas kuna ni City Councilor Germie Goulart, maysa daytoy a wake-up call tapno agtignay ti Vigan City government a mangipakat kadagiti addang a mangsalaknib daytoy a lugar a pagtangsit ti Vigan gapu iti pannakairamanna iti World Heritage List.

Ngem makapariribuk-panunot ti inyebkas ni Bise Gobernador Jerry Singson a maysa a fire hazard dagiti sumagmamano a pasdek iti Vigan Heritage Village agsipud ta malaksid a pagidispleyan dagiti negosiante kadagiti lakoda nga antigo nga alikamen ken dadduma pay a produkto, ditoy metten ti pagaramidanda ken pagtarimaananda kadagiti muebles.

Kinunana pay nga adda idi impasada nga ordinansa a mangiparit iti panagaramid iti muebles iti las-ud ti Vigan Heritage Village.

Daytoy ita ti kayat a gutugoten ti city council no apay a maipalpalubos ti panagaramid iti alikamen iti mismo a Heritage Village, idinto a maysa daytoy a panagsalungasing iti building ken fire code.

Salsaludsoden ken kayat a maammuan ti sungbatna ti city council no apay nga iti laksid nga adda inspeksion ken maobserba nga adda panagsalungasing iti paglintegan, naikkan dagitoy a pasdek-negosio iti clearances nga isu ti nagbatayan ti opisina ti mayor a nangited iti Mayor’s permit.

Yan ti rigatna, malaksid iti BFP, tagtagiuray pay laeng ti city council ti naisurat a report manipud iti Metro Vigan Water District a pangilawlawaganna no apay nga awan ti taona a napan nanglukat kadagiti fire hydrant a pagsusopan dagiti bombero iti pagdepdepda a danum.

Duan a daras a saan a nagparang ti manager ti MVWD iti pannakapaayabna iti SP tapno lawlawaganna ti statementna iti radio ken iti Rotary Club a napawilan dagiti taona a manglukat iti fire hydrant idi kangitingit ti uram.

Kas kuna ni Vice Mayor Franz Ranches, “makapariribuk” daytoy nga alegasion ti manager ti MVWD.

Uray ti ISECO, di met nagparang iti Question Hour ti SP idinto a rimmuar iti panagimbestiga ti BFP nga electrical short circuit ti nagtaudan ti uram.

Kasapulan ti pannakaipakat dagiti nainget nga addang tapno saanen a maulit ti napasamak, a no di maaksionan, posible a mangpukaw iti pagpampannakkel ti Vigan City a Heritage Village a daydaywen ken raraemen dagiti lokal ken ganggannaet a turista gapu iti kinaisangsangayanna.

Kuna ni Vice Gov. Singson: No mapukaw ti Vigan Heritage Village, mapukaw metten ti Vigan!#