Footer

Tanod, nakumpiskaaan iti paltog

SANTIAGO, Ilocos Sur – Gapu ta nakakumpiska dagiti polis iti maysa a paltog iti ikutna, sumango ti maysa a barangay tanod iti kaso a panagsalungasing iti election gun ban.

Inaresto dagiti polis babaen ti panangidaulo ni Police Inspector Mark Odilon  Javier Lagman ken babaen ti direkta a superbision ni OIC, Police Senior Inspector Roderick Abenojar Vintero ni Juanito Garcia y Dopale, 66, balo, mannalon, chief tanod ken residente iti Barangay Al-aludig ditoy nga ili idi agarup 2:00 ti bigat ti Nobiembre 2 sadiay Barangay Sabangan, kalpasan a nakakumpiskada iti ikutna iti maysa a cal .45 Armscor ken maysa a magazine assembly nga addaan iti walo a bala.

Madama ti panagpatrolia dagiti polis partikular iti barangay road ti Barangay Sabangana idi masalamaanda ti grupo dagiti tattao iti tengnga ti kalsada iti sanguanan ti Charmaine Videoke Bar a kukua ni Efren Elefante.

Iti panagpalutpot dagiti polis, nasiputanda nga adda agdukdukol a banag iti siket ti suspek ket idi sinitada daytoy, nasukalanda a paltog gayam.

Inaresto dagiti polis ni Garcia idi awan ti naipakitana  a lisensia ti paltog ken permit to carry firearm.

Naipababaen iti inquest proceeding ni Garcia iti opisina ti provincial prosecutor, Vigan City, iti panagsalungasing iti Comelec Resolution No. 9561-A in relation to Comelec Resolution No. 9735 ken panagsalungasing iti Section 28 (a) and (e) (1) ti RA No. 10591 a nai-docket iti babaen ti NPS No. I-03-INQ-13K-00154 ket nairekomenda nga agpiansa iti sag-P80,000.00 tunggal kaso.

Naipaima ni Garcia iti kustodia ti provincial jail babaen ti commitment order nga inyisio ni Judge Sixto D. Diompoc ti Regional Trial Court Branch 72, Narvacan, Ilocos Sur.#

 

Comments are closed.