Footer

Watch tower agpeggad a marsuod gapu iti treasure hunting

VIGAN CITY –  Agpeggad nga agrissuod ti Spanish watch tower sadiay Barangay Sulvec, Narvacan gapu iti treasure hunting.

Daytoy ti impalgak ni Bokal Jocelle Gironella, chairman ti committee on Indigenious and Muslim Affairs, bayat ti session iti hunta provincial itay nabiit.

Indatag ni Gironella ti maysa a gakat a pannakaideklara ti watch tower iti Barangay Sulvec, Narvacan, ken iti Barangay Bateria, San Esteban a provincial historic structures ken iti pannakakiddaw iti Philippine Historical Commission ti panagbalin dagitoy a historic structures.

Segun iti bokal, iti ipapanna panagsukimat iti opisina ti municipal assessor, natakuatanna a ti watch tower iti Barangay Sulvec ket adda iti ikub ti pribado a lote ti maysa a Canoza kas makita iti cadastral ken assessor’s record.

Kinuna ni Gironella a nangiyussuat ti lokal a gobierno ti Narvacan iti ejectment notice iti nasao a tao ngem imbasura ti korte ti Narvacan gapu iti kaawan ti meritona.

Naipaima ti kopia ti complaint ken ti dismissal ti ejectment iti komite ni Gironella.

Kasta met nga iti insayangkat ti provincial assessor’s office iti nasao a watch tower ket naduktalan nga adda nagkalian iti uneg gapu iti mapapati a kaadda iti kinabaknang ditoy ket agpeggad ti torre nga agrissuod gapu iti mapapati a treasure hunting.

Inrekomenda ti komite ni Gironella ti pannakaipaay iti ad-adda pay a panagadal ken ti pannakapaayab ti aggigian iti lote para iti diskusion iti pannakapreserba ken  pannakapasayaat ti watch tower.

Inggunamgunam pay ti nasao a komite ti pannakarisut ti legal issue no asino ti pudpudno nga akinkukua iti nasao a lote a nagsaadan ti torre agsipud ta mapapati nga awan ti naited a tax declaration iti mapapati a rehistrado nga akinkukua iti lote.

Mainaig iti watch tower iti Barangay Bateria, indagadag ni ni Gironella ti pannakidialogo ti gobierno probinsial iti municipal ken barangay governments ti San Esteban tapno matratar dagiti posible a risiris iti panagbalin daytoy a provincial historic structure.

Nagsaad ti watch tower iti foreshore land a sakup ti nasao a munisipio.

Mapapati nga adda pay sabali a watch towers ditoy probinsia.#