Footer

EDITORIAL: Nalibeg dagiti isyo a linilibeg dagiti lilibeg.

Kas mapaliiwmi, lalo ketdi a limmibeg dagiti isyo gapu iti pananglilibeg dagiti lilibeg wenno dagiti maawagan a master-planners iti hukos pukos. Naiyaw-awan, naibaliw iti agus dagiti ngumayngayebngeb nga isyo a rumbeng koma a masungbatan.  Ti rumbeng koma a pagsasaritaan nagbalinen a lumned-lumtaw.

Pudno la unay ti nasao ni  Presidente Aquino iti asalto a panagsaritana iti telebision iti 12 a minutos idi panagtapos idi napan a bulan, ti panagtakaw dagiti mannanakaw iti kuarta ti ili ti isyo, ngem ipilpilit a baliktaden dagitoy a master-planners, ipilitda nga iyaw-awan ken gaburan kadagiti mangiyaw-awan ken makaulaw. Tapno agtultuloy latta a pumayagpag dagiti baliktad a bukodda a gagem?

Saanda a kayat a lumitnaw ti agus a paganninawan dagiti naririmat a masakbayan, nababanal a grasia manipud iti agus ti panagbalbaliw. No pudno met la a karamanda iti essem a panagbalbaliw ti pagilian, apay a saan nga isu dayta ti rumbeng nga aramidenda a kas natakneng a public servant? Doble kara? Daydiay agtaud iti ngiwatda ket kasungani iti aramidda?

Saanto a dumteng ti namnamaen a naraniag nga agsapa no bumallaet dagiti manglilibeg kadagiti pudpudno nga isyo. Saanto a pulos a lumtaw ti ing-ingpen nga idudur-as no iduron dagiti kabukbukodan a gagem ken panggep. Mawawen dagiti umili iti panagbalbaliw, naumadan iti kanayon a pannakaaramat ti kinaasino ti naganda a kas pagimbagan dagiti tiwed ken welwel.

Agintaertayo koma iti pudpudno nga isyo: no kasano a mapasardeng ti pannakatakaw ti kuarta ti ili; pannakalapped a maaramat daytoy iti saan nga umno ken no ania la ditan a wagas ti panagliksaban. Daytoy ti isyo. Daytoy ti rason ken gapuna a saantayo a makalung-aw iti nalibeg a karayan gapu iti daan a sistema ti gimong—ti panangkaud ti saluad a kinabaknang ti ili; saan a maiparbeng dagiti naidatag a rason a nakausaranna wenno napintas a naidatag ngem saan met nga isu ti naaramid; panangburbor ti kuarta ti ili a saan a nairanud ti ili ken dagiti umili. Dagita ti rason no apay a ditayo makabangon iti kinarigat.

Maiyaw-awan  pay aya dagiti nakariingen iti kinapudno? Saanen, saandan a maiyaw-awan. Iyebkasdan dagiti makitada a madi.

Kas maysa a public servant, agserbi koma para iti pagimbagan ti ili ken dagiti umili a saan ket nga ibubussog ti bukod a bagi. #

Comments are closed.