Footer

Empleada, hinold-ap 3 lallaki iti national highway

BANTAY, Ilocos Sur – Arig sensilio a panggasolina laeng iti motorsikloda ti naala dagitoy tallo a mannanakaw iti maysa nga empleada ti gobierno a hinold-apda iti national highway a sakup ti Barangay Guimod ditoy nga ili idi Nobiembre 12.

Kas gunggonada iti panangipasungalngalda iti biag ken dayawda, dismayado la ketdi dagiti di nabigbig a suspek agsipud ta sumurok-kumurang P300 laeng ti pagbibingayanda iti linaon ti nasikuatda a bag ni Donabelle Bugarin y Palomares, 29, naasawaan, empleada iti National Statistics Office, Vigan Branch, ken residente iti Poblacion, Sto. Domingo, Ilocos Sur.

Dagus a nagresponde dagiti polis ditoy babaen ti panangipangulo ni Deputy Chief of Police, Inspector Jaymar Tapiruy Algeria kalpasan a nakaawatda iti tawag manipud iti selpon ti maysa a Zenny Pulido nga adda nahold-ap iti national highway a sakup ti Barangay Guimod. Napatalgedan dagiti polis a hinold-ap ti tallo a lallaki ni Bugarin bayat ti ipapanna iti opisinada iti dayta nga aldaw a nakalugan iti Honda Wave a motorsiklona.

Iti panagimbestiga dagiti polis, naammuan a bayat ti panagdaliasat ni Bugarin iti national highway, kellaat nga immabay kenkuana ti maysa nga sports motorcycle (jumper type) a nagluganan ti tallo a lallaki, ket maysa kadagitoy ti nanggammat iti bag ti biktima a nakaigapu ti pannakapukawna iti kontrolna iti manibela a nagresulta iti  pannakaikrasna.

Nupay nagsagrap iti dunor iti ulo ken sakana, timmakder ni Bugarin ket nagtaray a mapan agpatulong iti asideg a balay bayat ti panagpaarayatna.

Ngem sinurot dagiti suspek ket maysa kadakuada ti nangasut iti paltogna sana pinaturongan ti biktima ken ginammatan ti shoulder bag ti biktima.

Malaksid iti cash, naglaon ti bag iti USB kit para iti Samsung Wonder Cellular Phone, tax ID, postal ID.

Naglibas dagiti suspek a nagturong iti saan nga ammo a direksion.

Intaray dagiti nagresponde a polis ti biktima iti Metro Vigan Cooperative Hospital tapno maagasan dagiti sugatna.

Nagpatulong dagiti polis-Bantay kadagiti kaparangetna a  police stations a mangiwayatda iti dragnet operation ngem mapapati a nakalusot dagiti suspek.

Inladawan ti biktima dagiti suspek nga agtayag iti agarup 5’4”, kalkalaingan ti kababagida, kayumanggi, ababa ti buokda ken mapattapatta nga agtawen iti 20 agpababa.#