Footer

Welder, nakoriente, natay

TAGUDIN, Ilocos Sur – Awanen ti biag ti maysa a lalaki idi maidanon iti ospital gapu iti pannakorientena sadiay Barangay Del Pilar ditoy nga ili idi malem ti Nobiembre 11.

Natayen ni Philip Batin y Valdez, 34, naasawaan, welder ken residente iti Barangay Patac, Galimuyod, Ilocos Sur idi maidanon iti Tagudin General Hospital and Capillariasis Center, Barangay Bio, Tagudin, Ilocos Sur kalpasan a nakoriente bayat ti panagweldingna iti tuktok ti Generica Pharmacy idi agarup 5:00 ti malem ti nadakamat a petsa.

Naammuan a madama ti panagwelding ni Batin iti tuktok ti nasao a parmasiutika idi aksidente a naiggamanna ti maysa a live wire a puon ti nakakigtotan ken nakatinnaganna.

Mapapati a nagdisso ti biktima iti sementado a paset ti pasdek a nagsagrapanna iti dunor iti ulona ket nupay naitaray iti ospital, indeklara ti doktor a nangtaming kenkuana a dead on arrival.#

Comments are closed.