Footer

Abusado a polis, masaklangan tumutop a kaso

VIGAN CITY – Dua a nagsina a report manipud ditoy siudad ken iti ili ti Cervantes ti nangipaduyakyak iti agsupadi a kinatao ti dua a polis: maysa ti abusado, pasensioso ti sabali.

Iti immuna nga insidente, masaklangan iti tumutop a kaso maikontra ken ni PO3 Erwin Ubasa gapu iti mapapati a panangabusona iti takemna.

Segun iti report, idi malem ti Nobiembre 13, simmangpet ni Ubasa  iti sanguanan ti Hidden Garden a masarakan iti Barangay Bulala ditoy siudad ket naglalaaw a puon ti nakaalarmaan ken nagbutngan dagiti turista.

Mapapati nga adda iti inpluensia ti arak ni Ubasa iti dayta nga oras.

Kalpasanna, nakita ti polis iti sanguanan ti PCP a masarakan met laeng iti Barangay Bulala nga agsaedsaed kadagiti motorista.

Idi agarup alas 4:00 ti malem, nakadanon ni Ubasa iti Barangay Mindoro ket nagsaed ken nagtiliw kadagiti motorista ngem awan ti inyisiona a tiket.

Nagresponde dagiti polis ket insublida dagiti lugan kadagiti akinkukua.

Naireport ti polis ken ni Police Chief Inspector Antonio Lawagan Malidan, OIC, para iti pannakaipakat iti maikanatad nga aksion maikontra kenkuana.

Kabayatanna, iti insidente a napasamak iti Cervantes, Ilocos Sur, kalmado laeng ni PO2 Manuel Floebel Tiri, iti sanguanan ti panangbasbassawang kenkuana ti ama ti tiniliwda a menor de edad gapu iti panaglabsingna iti linteg-trapiko idi agsapa ti Nobiembre 19.

Segun iti report, bayat ti panagpatrolia da Tiri ken PO2 Jack Castigo, pinasardengda ni Jsam Rjay Cudiamat, estudiante iti Cervantes National High School ken residente iti Barangay Rosario, Cervantes, ken dua nga inlubbonna ket idi maduktalanda a nagpason ti lisensia ti menor de edad nga agmaneho ken di napabaro ti rehistrasion ti lugan, pinaiparkingda ti motorsiklo iti abaga ti kalsada.

Nupay kasta, pinalubosan dagiti polis dagiti estudiante a mapan agklase.

Madamdama, simmardeng iti sanguanan dagiti polis ti Isuzu Elf truck a minaneho ni Espiritu Reyes Cudiamat ket dimsaag daytoy sa makapungtot a nangibaga nga ited ni Tiri ti tulbek ti motorsiklo.

Mapapati nga arogante pay ni Reyes a nangitudotudo ken ni Tiri sa nagbalikas iti dakes.

Nupay kasta, nagtalinaed a kalmado ni Tiri sana insungbat: “Trabaho lang.”

Tapno saanen a rumaba pay ti situasion, nagturong dagiti polis iti police station, ukodda ti motorsiklo.

Iti pannakaisurat daytoy, maisagsaganan ti pannakaipila ti kaso a direct assault upon a person in authority maikontra ken ni Cudiamat.#

Comments are closed.