Footer

Bangka, napabettakan iti bomba

SINAIT, Ilocos Sur – Nadadael ti maysa a motorized banca gapu ta napabettakan iti explosibo sadiay Barangay Paratong ditoy nga ili idi agsapa ti Nobiembre 18.

Segun iti panagpalutpot dagiti nagresponde a polis iti panangidaulo ni Police Inspector Danilo Valoria, idi agarup 5:00 ti agsapa ti nadakamat a petsa, naduktalan laengen da Nelson Cabacungan y Guerrero, 62,  naasawaan, akinkukua iti bangka, ken residente iti nasao a barangay, ken ti kaduana a maysa a Rey-am Ibarra a nadadaelen ti bangka gapu ta napabettakan iti explosibo.

Mapapati a napabettakan iti explosibo ti bangka idi agarup 12:50 ti bigat ti nadakamat a petsa a kuna dagiti bumarangay a pannakangegda iti kanalbuong manipud iti igid ti baybay.

Nakasarak dagiti polis iti maysa a fuse nga agatiddog iti sumurok kumurang 4 a pulgada a mapapati a naaramat a kas mitsa ti ekplosibo.

Di pay ammo no apay a napabettakan iti ekplosibo ti bangka a mapattapatta nga agbalor iti P20,000.00.#

 

Comments are closed.