Footer

Gasolinaan, hinold-ap riding in tandem

STO. DOMINGO, Ilocos Sur – Saan laengen a panagpapatay ti isaysayangkat dagiti riding in tandem no di payen panaghold-ap.

Hinold-ap dagiti di pay nabigbig a lallaki a nagkalubbon iti motorsiklo ti Phoenix Gas Station a masarakan iti Barangay Poblacion ditoy nga ili idi agarup 9:00 ti rabii ti Nobiembre 20 ket intarayda ti naglakuan dagiti pump attendant.

Ngem iti panagimbestiga dagiti polis, posible a nagpaing dagiti hold-aper iti kaparanget daytoy nga ili iti amianan.

Limtuad iti panagimbestiga dagiti polis, kalpasan ti panaghold-ap iti Phoenix Gas Station a kukua ni Mitchelle Tacud Desierto, 31, ken residente iti Barangay Camestizoan ditoy met laeng nga ili, napakaskas a limmasat dagiti di nabigbig a suspek iti municipal road  a sakup ti Barangay Sta. Cruz sada nagpaamianan  a direksion  nga agturong iti Barangay Panay, Magsingal.

Ngem nupay nangiwayat dagiti polis ditoy iti panangidaulo ni Deputy Chief of Police, Inspector Mariano G. Fagela iti hot pursuit operation ken pinakaammuanda dagiti amin a barangay a posible a paglasatan dagiti suspek, nakalusot dagitoy.

Segun ken ni  natakaw ti sumurok kumurang P17,000 a koleksion ti paggasolinaan.

Kas panangisalaysay da  Marissa Ballaso y Rentutar, 24 years, awanan asawa ken residente iti Brgy. Camestizoan ken Christian Merry Rose Tabutol y Pulido, 19, awanan asawa ken residente iti Brgy. Cabigbigaan, agpada a pump attendant ti nasao a gasolinaan, madamada a bilbilangen ti naglakuanda iti lamisaan iti ruar ti opisina idi nagsardeng iti asidegda ti maysa a motorsiklo a nagluganan ti dua a lalaki a nakahelmet ken nakamaskara ken nagaruat iti diaket ket inasitgan ida dagitoy sada pinaturongan iti paltog.

Innala dagiti suspek ti kuarta a naikabil iti uneg ti plastic box nga agdagup iti sumurok-kumurang P17,000.00 sada dagus a naglibas nga agturong iti laud a direksion.#