Footer

Lokal a Gobierno ti Cabugao, pinadayawan ti Civil Service Commission

CABUGAO, Ilocos Sur – Sabali manen a pammadayaw ti naawat ti lokal a gobierno itay nabiit – ti panangipaay ti Civil Service Commission iti rebalidasion ti akreditasion daytoy nga ili a kas maysa nga ahensia ti turay.

Mismo a ni Officer In Charge ti CSC Ilocos Sur Cecilia S. Bareng ti nangiyawat iti sertipiko ti akreditasion kada Mayor Edgardo S. Cobangbang ken ni Vice Mayor Deogracias Jose H. Savellano iti simple a programa a naangay ditoy nga ili idi Nobiembre 18.

Timmabuno iti nasao a programa ni Senior Personnel Specialist, CSC Region I ken inimatangan dagiti konsehal ken hepe dagiti nadumaduma nga opisina ti munisipio a pannakaited ti rebalidasion ti Level II Accredited Status ti Cabugao kada Cobangbang ken Savellano.

Iti pannakaited ti revalidated accreditation iti Cabugao, agepekto a dagus ti appointment ti maysa nga empleado ti lokal a gobierno ditoy apaman a mapirmaan ti chief executive ket saanen nga aglasat pay no di mapakaammuan laengen ti Civil Service Commission.

Iti ababa a panagsaona, kinuna ni Cobangbang a ti panagkakammayyet dagiti opisina ken dagiti agtuturay iti lokal a gobierno ti kangrunaan a gapu a nagun-od ti Cabugao ti nasao a pammadayaw.

Sangapulo ket maysa nga LGU iti Ilocos Sur ti naikkan iti sertipikon ti akreditasion. Iti umuna a distrito, malaksid ti Cabugao, naikkan pay iti akreditasion ti Sinait, Magsingal, Sto. Domingo, ken Sta. Catalina.

Immuna a nagun-od ti Cabugao ti akreditasionna manipud iti CSC idi 2006.#