Footer

Muslim, binagsol ti padana a Muslim

BANTAY, Ilocos Sur – Nabagsol sadiay Darussalam Muslim Compound  idi sardam ti Nobiembre 15 ti maysa a muslim gapu ta inungtanna ti balasang ti kabsat ti suspek.

Nabigbig ti biktima a ni Mayaman Sacampong y Sallen 44, idinto a nainaganan ti suspek a ni Lando Papandayan y Bantaan, 55, naasawaan, negosiante, presidente ti gunglo dagiti Muslim iti nasao a compound.

Nagramut ti pammagkong idi napan inungtan ni Sacampong ni Jasmine Papandayan, anak ni Hadji Ali Papandayan, kabsat ti suspek, gapu ta mapapati a nakisakay ti balasang iti motorsiklo ti maysa a lalaki idi rabii ti Nobiembre 15.

Nangeg ni Lando Papandayan ti panangunget ni Sacampong ken ni Jasmine ket rimmuar iti mosque sana dinisnog ti biktima.

Nagboksing dagiti dua ket inasut ti suspek ti patademna sana imbagsol iti tian ti biktima.

Intaray dagiti nakakita ni Sacampong iti Metro Vigan Cooperative Hospital para iti pannakaagasna idinto a boluntario a simmuko ni Lando Papandayan iti polis.#

Comments are closed.