Footer

Parokia ni San Pablo, nakasaganan mangselebrar Rambak Kristo Ari

VIGAN CITY – Nakasaganan ti Parokia ni San Pablo a mangselebrar iti Rambak Kristo Ari a maangay ditoy siudad inton  Nobiemre 24.

Kinuna ni Fr. Vicente Avila, kura paroko ditoy siudad, a makatawen a sinaganaanda daytoy a selebrasion a tatta man laengen a maangay ditoy siudad iti las-ud ti 30 a tawen.

Kinuna ni Fr. Avila nga idi 1983 ti kaudian a panagsangaili ti Vigan City iti selebrasion ti Rambak Kristo Ari idinto nga innayonna a mapadayawan ti Parokia ni San Pablo nga ag-host iti parambak ita a tawen.

(Nagyaman ni Fr. Vicente Avila kadagiti amin a timmultulong ken  nangsuporta iti Parokia ni San Pablo a namagbalin a naballigi ti pannakaselebrar ti Rambak Kristo Ari. Impakaammo ni Archbishop Ernesto Salgado ti Arkidioses ti Nueva Segovia a maangay ti sumaruno a Rambak Kristo Ari sadiay Suyo, Ilocos Sur. -Ed.)

Segun ken ni Fr. Avila, nangrugi idi Septiembre 15 agingga iti Oktubre 29 daytoy a tawen, naselebraran ti Rambak Kristo Ari kadagiti nadumaduma a barangay ti siudad.

Innayon ti kura paroko a nagturongda metten kadagiti nadumaduma a pagadalan ti siudad para iti pannakaangay dagiti nobena.

Nagyaman ni Fr. Avila iti dakkel a suporta ti gobierno ti Siudad ti Vigan nga idadauluan ni Mayor Eva Marie S. Medina para iti panagballigi ti parambak ken iti kapolisan iti Vigan City para iti pannakatagiben ti urnos ken talna bayat ti panagdudupudop iti siudad dagiti deboto nga aggapu pay kadagiti nadumaduma nga ili iti probinsia ken uray kadagiti kaparangetna a probinsia.

Manamnama a rinibribu a deboto ken sangsangaili ti agdudupudop iti Vigan City para iti Naindaklan a Misa a maangay iti alas dos ti malem ti Nobiembre 24.

Pagsisinnublatan dagiti il-ili ken siudad ti probinsia  ti agsangaili iti daytoy tinawen a parambak a  maibilang a maysa kadagiti karangenan a selebrasion iti Arkidioses ti Nueva Segovia kas panagtamed ken ni Hesukristo a kas Ari.#