Footer

Ti Kontrobersia ti Pannakapapatay ni Al-Ghozi

(Naisurat daytoy nga artikulo ditoy pagiwarnaktayo idi 2003, sangapulo a tawenen ti napalabas. Ngem ipablaakmi manen ta iti baet ti kaundayen dagiti naruros a tawen, kapaliiwan a dagiti napaspasamak idi ket mapaspasamak latta iti agdama;  awan ti ania a nagbaliwanda, no adda man, nagsukat laeng dagiti nagan ken lugar. Kas kuna ti maysa a miron, sumalaysu. Ania ti panagkitam, kaka? Dakayon ti manghusgar iti kinapudno ti kapaliiwanmi)

 

 

Di pay bimmaaw no ar-arigen ti nabara nga isyo ti Kuratong Baleleng case, adtoy manen ti sabali a kontrobersia a nakaisawsawan ti PNP: ti misterio a pannakapapatay ni Father Rohman al-Ghozi, ti Indonesian a terorista a suspetsa iti pannakabomba ti Manila’s Light Railway Transit idi Disiembre 2000 a nakagudasan ti 22 a tattao.

Maipalagip a naglibas ni al-Ghozi, kaduana da Abdul Mukim Edris ken Omar Opik Lasal, iti nakaibaludanna iti uneg ti Camp Crame idi Hulio a puon ti naglak-aman dagiti agtuturay ti pagilian nangnangruna dagiti opisial ti PNP iti pannakapabain.

Maysa a burburtia no kasano a nakalibas ti maysa a balud a nakaaramid iti nakaam-ames a kas ken ni al-Ghozi iti nairut ti seguridadna a pagbaludan iti uneg a mismo ti Camp Crame.

Adda dagiti agkuna a nagna ti kuarta.

Sabali pay dagiti agkuna a napalusposanda tapno mabainan ti administrasion Arroyo.

Sumagmamano a lawas sakbay ti kunkuna dagiti polis officers nga engkuentro a nakapapatayan ni al-Ghozi, adda limtuad a sayangguseng a natiliwen daytoy ket addan iti ima ti polis.

Nadegdegan ti sayangguseng idi mapapatay ti maysa a kadua ni al-Ghozi a naglibas, ni Abdulmukim Edris ken ti pannakatiliw met laeng ni Omar Opik Lasal.

Taldiapantayo dagiti pasamak a nagtunged iti pannakagudas ni al-Ghozi kas panangisalaysay ni Senior Supt. Alan Purisima, hepe ti Presidential Anti-Crime Emergency Response (PACER).

Sumagmamano nga oras sakbay ti pasamak, nakaawat dagiti autoridad iti tip manipud iti tallo a sibilian informant nga agdaliasat ni al-Ghozi ken maysa a kaduana manipud North Cotabato nga agpa-General Santos.

Ngarud, nangipasdek dagiti kameng ti PACER ken ti 6th Infantry Division ti Army iti sumagmamano a checkpoint iti national highway ti ili a Pigcawayan.

Idi mapasungadanda ti multicab a naitip kadakuada a nagluganan ni al-Ghozi, pinasardengda. Ngem nagpaputok dagiti naglugan ket simmungbat dagiti autoridad.

Napudasdasan a ni al-Ghozi ti nagudas. Ngem nakalasat ti kaduana.

Dayta ti bersion dagiti autoridad.

Ngem kinuna ti maysa nga opisial militar a nakabase iti Zamboanga City a “napapatay ni al-Ghozi kalpasan a nagbayad ti Pacer iti dakkel a kantidad manipud kadagiti mangguguardia ken mangilemlemmeng kenkuana.”

Sabali pay nga army official ti nagkuna a maysa a klasika a senario ti militar ti napasamak. No patien daytoy nga opisial, iti “panagbasana”, addan ni al-Ghozi iti kustodia ti gobierno sakbay ti makunkuna a shootout.

Kasta met ti pammati ni Sen. Ramon Magsaysay, Jr. agsipud ta adda dagiti report nga addan ni al-Ghozi iti ima ti militar ket inton dumteng ti “umno a tiempo”, “maisakripisio” daytoy.

Uray ni North Cotabato Gov. Manuel Piñol, impettengna nga awan ti shootout iti lugarna agsipud ta dua laeng a putok ti nangeg.

Kas ninamnama, pinaglibakan ni Ebdane dagiti palagid a napapatay ni al-Ghozi ket nairanta iti umadani a panagbakasion ni US President George W. Bush.

“Saan koma a mamansaan iti kolor pulitika ken ispekulasion ti trabahomi iti PNP,” kinuna met ni Senior Supt. Allan Purisima.

Iti sabali a bangir, suspetsaen ni Sen. Aquilino Pimentel a naplano ti pannakapapatay ni al-Ghozi “probable tapno mapagulimek ket saanen a maammuan no kasano a nakalibas iti Camp Crame.”

Ngem iti biang ni Presidente Gloria Macapagal-Arroyo, maysa a dakkel a balligi iti gubat ti terorismo ti pannakagudas ni al-Ghozi.

“Ti pannakatay ni al-Ghozi ket senial a saan a makaadayo dagiti terorista iti Pilipinas, ken tukmaan ida ti atiddog nga ima ti linteg,” kinuna ni GMA.

Pammaneknek a no napinget ti PNP iti pagrebbenganna, agballigi iti kampania kontra iti kriminalidad!#

Comments are closed.