Footer

BANNER NEWS: Hustisia, dinawat ina ti 3-bulan nga ubing a biktima ti stray bullet

VIGAN CITY – Naitabon ti tallo-bulan nga ubing a biktima ti stray bullet itay Sabado a di pay maawat dagiti nagannak kenkuana a nagudas daytoy manipud iti ima ti maysa nga iresponsible a gun owner.

Segun ken ni Vanessa, ina ni Von Alexander Llagas y Quemi, iti daytoy a panangpasangbayda iti baro a tawen, saanen a gimmatang ti lakayna iti paputok agsipud ta saanda kayat a maisarsarak dagiti annakda iti baet nga iti kallabes ket gimmatangda iti rebentador a pinabettak dagiti annakda kas panangsaraboda iti isasangbay ti Baro a Tawen.

“Saankami a gimmatang iti paputok iti daytoy a baro a tawen tapno maiyadayo iti peggad dagiti annakmi ngem dimi impagarup a makettel ti biag ti inaudian nga anakmi babaen ti naiwawa a bala manipud iti maysa nga iresponsible a gun owner, kinuna ni Mrs. Llagas.

Segun ken ni Mrs. Llagas, adda ni Von Alexander, tallo-bulan-ti-tawenna nga anakda a matmaturog iti kuartoda iti abay ti asawana a ni Valeriano idinto nga addada iti salas iti dayta a panangpasangbayda iti baro a tawen idi nakangeg iti kanalteek iti sim ti balayda.

Idi damo, impagarup ni Mrs. Llagas nga adda nagubor iti balayda ngem nangegna ti panagsangit ti anakda isu a napanna kinita.

Naklaat laengen ni Mrs. Llagas idi nakitana a daradara ti ulo ti anakda.

Intarayda ti ubing iti Gabriela Silang General Hospital ngem mapapati a saan a kabaelan dagiti doktor ditoy gapu iti kakurang ti instrumentoda ket inyalisda iti Metro Vigan Cooperative Hospital.

Segun iti ina, adda pay la anges ti anakna idi itarayda iti ospital nupay nabannayaten.

Ngem indeklara ti doktor a nangtaming iti ubing nga awanen ti biag daytoy.

Nagyaman ni Mrs. Llagas ken ni Gov. Ryan Singson iti panangipaay ti gobierno probinsial iti pinansial a tulong iti pannakaidulin ti anakna idinto nga indagadagna  a makonsensia koma ti nagpaputok iti paltog a nanggudas iti anakna ket sumukon iti autoridad.

“Ammok a dimo met kayat a kasta ti mapasamak iti anakmo,” kinuna pay ni Mrs. Llagas a naiturong iti di pay nabigbig a nagpaputok iti paltog.#

Comments are closed.