Footer

Pannakagudas 3-bulanna nga ubing babaen ti stray bullet, kinondenar ni Gov. Singson

VIGAN CITY – Kinondenar ni Gov. Ryan Singson ti pannakagudas ti biag ti tallo-bulanna nga ubing a natiruan ti ulona babaen ti naiwawa a bala iti isasangbay ti  2014.

Iti mensahena, kinuna ni Singson: “The entire province of Ilocos Sur strongly condemns the untimely death of a three-month-old from Barangay Anonang Mayor, Caoayan, Ilocos Sur who is a victim of senseless killing by an irresponsible gun owner. We cannot tolerate this inhumane act and stands firm towards the protection and security of our people, be it inside or outside our homes.”

Para iti madagdagus a pannakasolbar ti kaso, nangitanggaya ti gobernador iti P250,000.00 a gunggona iti asinoman a makaibaga iti impormasion para iti pannakatunton ti kinasiasino ti nagpaputok a nakaigapuan ti pannakatiro ti ulo ti tallo-bulan ti tawenna nga ubing iti uneg ti balayda sadiay Barangay Anonang Mayor.

Imbilin pay ti gobernador ken ni Provincial Administrator Daquep ti panangidanonna iti pamilia ti biktima ti pinansial a tulong ti gobierno probinsial iti pamilia ti biktima.

“… Nasakit ti nakemko iti daytoy a napasamak ta ubing unay daytoy biktima ti indiscriminate firing … ubing unay a nakettel ti biagna isu a nagdesisiontayo a mangted iti gunggona,” kinuna ni Singson.

Segun iti inisial a panagimbestiga dagiti polis, matmaturog ni Von Alexander Llagas y Quemi, kaabayna ni Valeriano nga amana, idi linussok ti bala ti sim nga atep ti balayda ket nagdisso iti ulo ti matmaturog nga ubing.

Intaray da Valeriano ti ubing, immuna iti Gabriela Silang General Hospital, sada inyalis iti Metro Vigan Cooperative Hospital a nakaideklaraanna nga awanen ti biagna.

Segun iti gobernador, imbilinnan ken ni Provincial Director Police Senior Supt. Jemar Modequillo ti panangtutok daytoy iti inbestigasion para iti madagdagus a pannakatunton ti nagpaputok ken pannakaited iti hustisia iti pamilia ti biktima.

Kinuna ni Singson a “konsensiatayo amin daytoy” idinto nga indagadagna kadagiti kailianna nangruna dagiti lumugar iti Caoayan, Ilocos Sur tapno ireportda iti kapolisan dagiti nakitada a nagpaputok iti dayta a rabii.

Kabayatanna, adda latta dagiti nagatel ti ramayda nga agtagikua iti paltog ta nagpaputokda latta iti baet ti kampania ti kapolisan maikontra iti panagpaputok iti paltog.

Paneknekan daytoy dagiti nasarakan a naiwawa a bala iti dua a balay ken iti plasa ti tallo a barangay ti Bantay ken iti balay ti maysa a kagawad sadiay Caoayan.

Sabali pay a balay iti Barangay Naguilian ditoy met la nga ili ti linussok ti naiwawa a bala, agarup 15 minutos kalpasan ti isasangbay ti baro a tawen.

Maysa a deformed slug manipud iti cal. 45 ti nasarakan dagiti bumalay a da Eufrocina Arre y Aspacio, 50, naasawaan, barangay kagawad, iti uneg ti balayda a mapapati a nanglussok iti sim.

Pagyamanan ta awan ti nadalapus ti naiwawa a bala a bumalay idi simrek iti balay da Arre.

Impaima da Arre ti buli kadagiti nagresponde a polis.]

Iti ili ti Bantay, lima a naiputok a bala ti nasarakan dagiti polis bayat ti panagpatroliada sadiay Barangay Ora idi agarup 2:20 ti bigat ti Enero 1.

Aksidente a nakita dagiti polis dagiti naiputok a bala manipud iti cal. 9mm iti plasa ti nasao a barangay ngem saanda a nasapulan dagiti nagpaputok.

Naireport met nga inabutan ti naiwawa a bala ti balay ni Alejandro Madriaga y Padre, 76, naasawaan, ken residente iti Barangay An-annam idi agarup 12:25 ti bigat ti Disiembre 31.

Segun iti report, mangmangan da Ricardo Carpina y Soriano, 33, naasawaan, tricycle driver, ken ti pamiliana iti balkonahe  idi nakangegda iti nanalteek iti atep ti balayda a kasaruno ti pannakatinnag ti bala iti asidegda.

Kinuna ni Carpina a nakangegda kadagiti nagsasaruno a kanalbuong sakbay nga adda  nagdisso a buli iti asidegda.

Di pay ammo no asino dagiti nagpaputok.

Kabigatan met ti baro a tawen, insuko da Virgilio Salinas y Pelayo, 40, naasawaan, ken residente iti Barangay Aggay ken ni Ruby Ortega y Baclig, 30, naasawaan, ken residente iti Barangay Lingsat ditoy met laeng nga ili ti saggaysada nga slug manipud iti di pay ammo ti kalibrena a paltog.

Kinuna ni Salinas a bayat ti panangselebrarda iti baro a tawen iti ruar ti balayda, simrek ti balasangda iti kuartona ket nabaddekanna ti maysa a bala.

Segun met ken ni Ortega, madama nga aglutluto idi nakangeg iti nanalteek iti atep ti balayda ket idi nagusisa, naduktalanna a naabutan ti sim ket nakitana ti slug iti asideg ti ruanganda.

Adda itan dagiti slug iti ikut ti Bantay police station para iti umisu a disposision.#

 

Comments are closed.