Footer

Selebrasion ti Baro a Tawen, nagtungpal iti trahedia

CERVANTES, Ilocos Sur – Nagbalin a nakaladladingit ti panangselebrar ti maysa a pamilia iti Baro a Tawen agsipud iti pannakalmes ti dua a kameng bayat ti panagpipiknikda iti igid ti maysa a karayan ditoy nga ili idi malem ti Enero 1.

Iti report manipud iti polis ditoy nga ili, naideklara a dead on  arrival iti Bessang Pass Memorial Hospital a nakaitarayanda da Rizalina Daducao, y Bulie, 20, balasang, agbasbasa iti University of the Cordilleras, Baguio City; ken Ricamae Daducao y Bulie, 22, balasang, estudiante iti Adamson University, ken agpada a residente iti Mankayan, Benguet.

Naireport a serioso ti kondision ni Josie Ann Panganiban y Cuyog, 15, ken residente met laeng iti Mankayan, Benguet.

Naammuan iti inbestigasion a napan nagpipiknik dagiti biktima, kaduada dagiti kameng ti pamiliada iti igid ti karayan sadiay Barangay Comillas North ditoy idi agarup 3:50 ti malem ti umuna nga aldaw daytoy a tawen.

Nagdidigos dagiti biktima iti karayan ket mapapati a naturongda ti nauneg a paset ti karayan nga awan ti nakakita kadagiti dadduma pay a kameng ti pamilia.

Kinuna ti ama dagiti nalmes a saan nga ammo dagiti annakna ti aglangoy.

Iti pannakaisurat daytoy, adda pay ni Josie Ann iti grabe a kasasaad.

Kabayatanna, dua nga aldaw sakbay ti Baro a Tawen, biag ti maysa a kameng ti Philippine Air Force ti nagbalin a kasukat ti panangalawna iti dua a kaanakanna idi ginuyod dagitoy ti napigsa a dalluyon bayat ti panagdidigosda iti baybay ti Sitio Caloocan, Brgy Libtong, Tagudin, Ilocos Sur.

Naireport a nalmes ni 1st Lt. Mark Alvin Lagria y Delim, 29, PAF member a nakabase iti Lapu Lapu City ken residente iti nadakamat a barangay kalpasan nga insalakanna iti pannakalmes ti dua a kaanakanna.

Iti inisial nga inbestigasion, idi agarup 7:30 ti agsapa ti Disiembre 29, napan ti biktima, dagiti dua a kaanakanna ken kakabsatna iti beach ket bayat ti panagdidigosda, ginuyod ida ti napigsa a dalluyon.

Inarayat ni Lagria dagiti kaanakanna ngem kalpasan a naisalakanna dagitoy, saanen a nakapaigid ta mapapati a napaksuyan ket ingguyod metten dagiti dalluyon.

Naalaw ti bagi ni Lagria nga agtatapaw iti igid ti baybay a sakup ti Barangay Tarangotong idi agarup alas 11:00 ti bigat iti dayta met laeng nga aldaw.

Naitaray ti biktima iti Tagudin General Hospital ngem naideklara nga awanen ti biagna idi naidanon iti ospital.#