Footer

3 miembro ti Acetylene Gang, naiyalat iti operasion ti Police Cordillera

BAGUIO CITY – Tallo a miembro ti grupo nga agtaktakaw kadagiti bangko nangruna kadagiti pawnshops ken jewelry stores ti nanabtuog iti ima dagiti pannakabagi ti linteg itay nabiit kas paset ti panagtungpal ti kapolisan ditoy iti pammilin ti PNP chief a pannakapugipog dagiti organisado a grupo ti krimen iti pagilian.

Iti maysa a presscon a naangay iti police office ditoy siudad itay Enero 7, impresenta ni PRO-Cordillera Regional Director Isagani Nerez iti media dagiti naaresto a kameng ti Acetylene Gang, grupo dagiti agtaktakaw ti bangko babaen ti panangputedda iti bolt, a pakaibilangan da Requinio Dacmeg  y Bulanit, 36, natibo iti Sagada,  Mountain Province; Randy Pelkeng y Damitan, 37,  ken James Yayak y Batungan ,44, agpada a taga-La Trinidad, Benguet.

Naaresto dagiti suspek iti nagsisina a manhunt operations nga insayangkat dagiti operatiba ti PRO-Cor.

Kinuna ni Nerez, naaresto ni Dacmeg idi Enero 1 sadiay Saint Theodore Hospital a nakaipaagasanna kalpasan ti pannakipinnaltogna kadagiti polis a mangaresto kenkuana kas maibasar iti warrants of arrest nga inyisio dagiti korte ti Olongapo City, Zambales ken Cavite.

Natiliw met idi Enero 6 da Pelkeng ken Yayak iti El Pacifico Pension House a masarakan iti Sta. Cruz, Manila kalpasan ti makabulan a surveillance operation dagiti polis.

Segun iti polis, sumangsango ni Dacmeg iti kaso a robbery ken illegal a panagikut iti paltog iti korte ii Cavite, Olongapo City ken Zambales; ni Pelkeng iti robbery iti Vigan City, Ilocos Sur; ken ni Yayak iti robbery sadiay Roxas City, Capiz.

Kinuna ti regional director a nupay nakabase iti Cordillera dagiti tallo a naaresto a kameng ti Acetyline Gang, agop-opera ti grupo iti sapasap a pagilian ket kangrunaan a taktakawanda dagiti pawnshops ken paglakuan kadagiti alahas.

Ti grupo dagiti suspek ti mapapati a nangisayangkat iti panagtakaw iti maysa a pagsaldaan iti Isabela ken iti pannakagandat a matakawan dagiti dua a pawnshop iti Baguio idi Disiembre itay napan a tawen.

Kinuna ni Nerez a babaen ti pannakikoordinarda kadagiti nadumaduma a police stations iti probinsia, munisipal, ken siudad kangrunaan a puntiriada ti pannakaitudo dagiti amin a tattao a nainbolbar kadagiti panagtakaw, protektorda man  pinansier wenno utek.

Innayon ni Nerez nga adda pay nabuangay nga espesial nga investigation task force a mangtutok iti kaso ti Acetylene Gang.

Kinuna pay ni Nerez nga agtultuloy ti panagtrabahoda para iti napigpigsa a relasionda kadagiti nadumaduma a barangay iti rehion para iti pannakaipasdek iti sistema ti depensa maikontra kadagiti kriminal agingga iti tukad ti komunidad.# (Karaman ti report ni Carlito C. Dar, PIA-CAR)

Comments are closed.