Footer

41 tatadien a manok, natakaw, menor edad karaman naaresto

STO. DOMINGO, Ilocos Sur – Uppat a lallaki a pakairamanan ti maysa a menor de edad ti naireport a nagtakaw kadagiti tatadien a manok iti maysa a game farm sadiay Barangay Paguraper, ditoy nga ili idi rabii ti Enero 6.

Nainaganan dagiti suspek a da Danilo Torricer y Mirma, 25, baro,  Zaldy Terwel y Pablo,  Jimberly Ignacio y Pablo, ken ti menor de edad a nailinged iti nagan a John B, agpapada amin a residente iti nadakamat a barangay.

Segun iti report, madama ti panagronda da Junray M. Olimpo, Joel B Bolo, Frederick B. Bolo ken Bryan Nebria, caretakers ti Molave Base Game Farm a kukua ni Ed Ranchero, maysa nga OFW, ken natibo iti Narvacan, Ilocos Sur, idi nasalamaanda ti maysa a lalaki a kimmalabkab iti kongkreto nga alad sa timmapuak a bimmangir.

Iti panagsukimat dagiti caretakers no adda napukaw kadagiti tarakenda a manok,  nakitada ni Torricer nga aglemlemmeng iti nasipnget a parte ti farm, igpilna ti maysa a tatadien.

Dagus a tinengngel dagiti caretakers ni Torricer sada kinumpronta agingga iti impalgak daytoy dagiti kakaduana.

Inreport dagiti caretakers ti insidente iti police station ditoy ket nangiwayat dagiti pannakabagi ti linteg iti hot pursuit opperation a nagtungpal iti pannakaaresto ni Olit.

Iti follow-up investigation nga inwayat dagiti nagtitipon nga elemento ti CIDG iti kabigatanna, naduktalan a 15 a para pallot a manok ti mapukpukaw a mapapati a tinakaw dagiti suspek.

Ngem iti sabali a report, mapapati a dua nga aldaw a nagsaganad a tinakawan dagiti suspek ti nasao a game farm ket agdagup amin iti 41 dagiti mapukpukaw a tatadien a manok.

Nakarekobre pay dagiti polis iti crime scene iti 15 a tali a naiparaut kadagiti pegs, maysa a bolo, ken maysa a nangisit a diaket nga addaan iti puraw nga stripes a mapapati a nabati ti maysa kadagiti suspek.

Kinuna ni Chief of Police Honesto Lazo, Jr. a naidatagen ti rekord a panagtakaw maikontra kadagiti suspek iti opisina ti provincial prosecutor iti Vigan City.

Naipaima metten iti DSWD ti menor de edad a ni John B.#

Comments are closed.