Footer

BANNER NEWS: 4 natiliw iti nagsaganad a drug operation nga inwayat ti Vigan City police

VIGAN CITY – Dua a lalaki ti naipiskot dagiti polis bayat ti maysa a pot session ti maiparparit a droga  sadiay Barangay Ayusan Norte  bigat ti Enero 7 idinto a dua  pay a mapapati a drug pushers ti inarestoda iti panagsukisok nga insayangkatda iti Barangay Tamag idi malem ti Enero 8.

Natiliw agarup 8:50 ti bigat bayat ti  mapapati a pot sessionda iti droga iti maysa a balay iti Ayusan Norte da Juan Arellano, Jr. y dela Cruz, 36,  naasawaan, ken residente iti Barangay III, Vigan City ken Melchor Rivad y Ramos, 43, naasawaan, tricycle driver ken residente iti Barangay Busiing Norte, San Ildefonso.

Nagresponde dagiti dagiti nagtitipon nga elemento ti Vigan City Police, PAIDSOTG, ISUR PPO ken PDEA ISSET kalpasan a nakaawat ti Vigan City police station iti tawag ti telepono manipud iti maysa a maseknan nga umili nga adda maang-angay a pot session iti maysa a pagtaengan iti  barangay Ayusan Norte.

Ngem idi makasangpet dagiti polis iti pakaang-angayan ti pot session,  nakaangot dagiti suspek ket nagtatarayda a naglibas iti nadumaduma a direksion.

Kinamat ida dagiti polis agingga a naipiskotda dagiti suspek ken nakasamsamanda iti droga ken drug paraphernalia.

Iti insayangkat dagiti polis a panagsukisok iti nasao a pagtaengan a sinaksian dagiti barangay officials ken kamkameng ti media, nakakumpiskada iti innem a lighters, 2 improvised glass tooter, 1 rolled aluminum foil (dakkel), 14 improvised aluminum foil tooters, 7 nausar a foil, 3 awan naggianna a transparent plastic sachet , 7 transparent plastic sachet nga addaan mapapati a shabu residue, 2  a selpon ken cash money nga agdagup iti P510.00 pesos.

Kabayatanna, tallo a lallaki ti inaresto ti joint elements ti Vigan CPS, PAIDSOTG, ISUR PPO ken PDEA ISSET iti babaen ti direkta a superbision ni PSupt. Maximo Taclas, OIC chief of police of Vigan City iti inwayatda a panagsukisok iti balay ti maysa kadagiti suspek.

Inaresto dagiti otoridad ni Zosimo Tamag y Sotelo, 57, naasawaan; ken ni Rodel Aquino y Ayco, 37, baro, ken residente iti Barangay Raois, Vigan a nairana nga adda iti uneg ti balay idi maisayangkat ti search warrant nga inyisio ni Judge Francisco Ante, Jr. ti Municipal Trial Court in Cities, First Judicial Region, Vigan City, Ilocos Sur.

Segun iti police, mapapati a maysa a drug den ti nasao a balay.

Iti pannakaisurat daytoy, at large ni Kenneth Tamag, 37, naasawaan, ken residente met laeng iti Barangay Tamag, Vigan.

Nakakumpiska dagiti polis bayat ti panagsukisokfs iti 3 heat sealed transparent plastic sachet nga addaan iti white crystalline substance a mapapati a shabu, 1 a di naserraan a transparent plastic sachet a nagkarga iti mapapati a shabu, assorted shabu paraphernalia, 17 live ammunitions para cal. 45 ken maysa a  live ammunition para iti di ammo a caliber.

Iti pannakaisurat daytoy, maisagsaganan ti kaso a panaglabsing iti RA 9165 maikontra kadagiti naaresto.#

 

Comments are closed.