Footer

Barangay kagawad, ginudas lalaki a nakasakay iti motorsiklo

STA. MARIA, Ilocos Sur – Awan pay makalawas kalpasan ti iseserrek ti baro a tawen, dua a pammaltog ti nagsaganad a naisayangkat sadiay Magsingal ken daytoy nga ili a puon ti nakagudasan dagiti biktima a pakairamanan ti maysa a kagawad ti barangay.

Segun iti police,  napapatay idi sardam ti Enero 4 ni Remigio Atendido y Garcia, 58, naasawaan, incumbent  kagawad ti Barangay Maynganay Sur, ditoy nga ili  iti sanguanan ti balay ni dati a kagawad Rodrigo Soquila.

Iti panagimbestiga dagiti polis, makipatpatang ni Atendido ken ni Rose Imelda Soquila, Rosel Soquila, Letty Racca, Celso Batac ken Pacita Lagmay, dati a barangay secretary, idi kellaat nga immasideg ti armado a lalaki sana pinaltogan iti sumagmamano a daras ti biktima.

Nagsagrap ni Atendido kadagiti sugat iti ulona ken nadumaduma a paset ti bagina a puon ti nakatayanna a dagus.

Naglibas a dagus ti pimmaltog, kuyogna ti paltogna a mapapati a cal. 5.56 (M16 Armalite rifle) kas maibasat iti 3 a kapsula a narekobre iti nakapasamakan ti krimen.

Narekobre pay ti SOCo team ti Nokia cellphone ti biktima, di pay ammo ti dagupna a kuarta, 2 a rosario ken papel nga addaan numnumero.

Kinuna ni Rosel Soquila, sakbay ti pammaltog, nakitana ti maysa a traysikel a sumangsango iti abagatan iti akinlaud nga abaga ti national highway nga adda nakasakay a lalaki a kalalaingan ti pammagina.

Ngem saan a nabigbig ni Soquila ti lalaki.

Kinuna pay ni Soquila, a sakbay a simrek iti balayda, nasiputanna ti nasao a traysikel a nagpaabagatan ket apaman a nakauneg, nangegna ti panagmenor daytoy iti sanguanan sa nakangeg iti nagsasaruno a tallo a kanalbuong.

Awan ti nakabigbig iti pimmaltog agsipud ta nakaabungot daytoy.

Iti pannakaisurat daytoy, di pay ammo ti motibo ti pammapatay.

Kabayatanna,  napapatay ni Marjon Benabese y Bello, 25, baro, ken residente iti Barangay Bacsil Angad, Bangued, Abra idi agarup 8:20 ti sardam ti Enero 3 bayat ti panagdaliasat ti Honda TMX a minanehona iti national highway a sakup ti Barangay San Clemente.

Kasakay ti biktima iti motorsiklona ni Quennie Bautista y Tabarrejo, ti gayyemna a babai, a nagpaabagatan a direksion ket idi  makadanonda iti nadakamat a lugar, pinaltogan ida iti namitlo a daras ti maysa a lalaki a nakalugan met iti motorsiklo.

Nabaelan ni Benabese nga inasut ti paltogna ngem mapapati a dina natiruan ti suspek a naglibas iti abagatan a direksion.

Intaray dagiti nagresponde a polis nga indauluan ni Police Inspector Jaime Laguesma ti biktima iti Magsingal District Hospsital ngem pimmusay daytoy gapu iti sugatna iti makannigid a paset ti rupana a limsot iti tengngedna.

Nakarekobre dagiti polis iti crime scene, iti ikut ni Bautista, iti maysa a cal. 45 pistol Colt Mk IV series 60 nga addaan iti serial No. 025198 a mapapati a kukua ti biktima, 7 a kapsula ti cal. 45, P12,000.00 ken nangisit a selpon.

Naipatulod dagiti ebidensia iti crime laboratory para iti pannakaamirisda.#