Footer

EDITORIAL: Nasalimuot A Panagbalbaliw Edukasion

Ayonanmi ti singasing dagiti uppat a dadakkel a  unibersidad a mangiyalis ti panagseserrek iti klase a mapan iti Agosto wenno Setiembre, iti rason a rumbeng a maipada ti academic calendar para iti masagsaganaan nga economic integration ti Southeast Asian region iti  2015 tapno saan a lapped iti harmonia ti panagpapada wenno iti kadaksan a panirigan, ti pannakaipasuli wenno pannakabati ti pagilian iti aniaman a dur-asan ti edukasion iti napanawen nga aspekto. Ti panagbalbaliw ket nasirmatan idi pay laeng 1963 a kaunaan a pannakaiyalis ti serrek ti klase ngem naisubli met laeng iti dati gapu iti rason ti kinaawan iti maitutop a panawen itoy.

Ngem kadagiti managayat iti panagbalbaliw ken dur-as, saanda nga agpatingga a mangipuni iti singasing tapno saan a paudi wenno maipasuli edukasion iti pagilian iti napapanawen a kasasaad ti gimong nangruna la unay iti panangtingiting iti sangsangkamaysa a turongen.

Wen, nasalimuot a panagbalbaliw daytoy, ngem apay a saan nga ikkan iti tiansa dagiti agpinget a mangpadas yantangay nabayagen nga adda dayta nga ingpen ken dagiti rason iti panagbalbaliw. No saan nga ipaay kadakuada dayta a tiansa, kasano koma a maamiris ti pagsayaatan ken pagdaksan ti amin?

Adda karbengan dagitoy nga eskuelaan, kas naipaayan iti mandato a mangpataray a bukod ti bagbagi a kas naagapad iti maysa nga autonomus a sistema; ti panangliklik iti madadael nga oras a panagadal iti panawen ti katutudo ken bagyo gapu iti pasaray pannakasuspenso ti klase, kamkamatenton ti titser ti panawenna a mangileppas iti orasna a mangiyadal iti asignatura.

Ti makunami, iti kinaatiddog ti break wenno panaginana dagiti estudiante iti umuna a tawen, mabalin met nga ipaay kadakuada ti sabali nga alternatibo a pakaituonan ti imatangda, kas koma ti panagenrol kadagiti ababa a kurso bokasional a makatulong kadakuada a kas nayon ti kabaelan wenno credentials.

No maamiris a positibo ti  resulta, paggunayen ti kadena ket sangsangkamaysan ti agos ti panagbalbaliw. No negatibo ti resultana, nawaya latta nga agsublida iti dati a sistema ken yantangay kabukbukodanda iti aramidenda nga eksperimento, isuda laeng ti maapektaran.  Saan met a maapektaran ti sistema pangpubliko ken dagiti pribado nga eskuelaan a saan a simmurot itoy.

Ited iti edukasion ti tiansa a panagbalbaliw, iti  napapanawen ken maitutop unay nga ingpen ti Asean region.(JMAgpalo, Jr.)

Comments are closed.