Footer

Masapul ti Atiddog a Kurdon

Kolum : Sinursuran

Ni Jobert M. Pacnis

(Maudi a paset)

 

Liklikan dagiti namantika a taraon, nasasam-it ken naaapgad. Ken ti sigarilio ken amin a kita ti nasanger!

Ngem ketdi, masapul a buyogan dagitoy iti napudpudno nga ehersisio. Kayatna a sawen, ipapati ti panagwatwat. Saan a no adda laeng panawen. Di nga agusar kadagiti adu a rason tapno di maannong ti rumbeng.

Tapno ma-enjoy ti benepisio ti panagwatwat, masapul nga aramiden iti regular a panawen. Ania man ti mapaspasamak, masapul a maaramid iti naituding a kanito. Aramiden a kas paset ti inaldaw-aldaw– no dayta ti imprograma iti bagi– a panagbiag. Laglagipen, para iti salun-at ti panagwatwat, saan a pagdadaelan laeng iti oras.

Daytoy a panagdalus, saan laeng met iti pisikal a bagi. Masapul met ti ispiritual a panagdalus. Ta daytoy ti mangitan-ok iti biagtayo. Tulbek pay daytoy ti atiddog ken naragsak a panagbiag. Tallo laeng met ti masapul, segun ken ni Thelma Lewis- awtor dagiti nadumaduma nga inspirational book, tapno magun-od dagitoy.

Panangisuko. Panagtungpal. Panagserbi. Dagita laeng.

Panangisuko. Isuko/Ikumit ti bagi/kinatao iti Dios. Ngem no agikumittayo, saan laeng a paset no di ket ti sibubukel a bagitayo.

No ania man ti dalanentayo iti panangisukotayo ti amintayo iti Dios, saantayo kano a pagdanagan ta adda a kanayon a mangbaybayabay kadatayo. Ngem sabagay, adu kadatayo ti agkunkuna nga isuksukotayo ti amintayo Kenkuana. Pagdaksanna, ditayo met agtungtungpal kadagiti bilinna.

Panagtungpal. Panagtulnog. Idi punganay, insagut ti Dios ti atiddog a biag kadagiti parsuana. Ngem gapu iti basol, di nagtungpal ti tao, naputed daytoy ket nagbalin a 120  a tawen laengen. Ngem ti agbiag iti kasta kaunday kadagitoy a panawen, maysan a dagensen kadagiti ipatpategtayo; ken aglalo la unayen iti bagitayo.

Adu dagiti kari iti Nasatuan a Surat ngem naibugas met kadagitoy dagiti kondision. Maysa ditoyen ti atiddog ken naragsak a panagbiag. Ngem masapul a tungpalem dagiti kondision. Ditoy ti kaaduan a pakatinnagantayo. Ngem masapul laeng a laglagipen a no pudpudno nga ay-ayatentayo ti Dios, no pudpudno nga insukotayo ti amintayo Kenkuana, masapul a surotentayo dagiti Bilin.

Wen, adu dagiti kari ti Dios kadatayo. Ket no maminsan, saantayon nga ammo no ania ti surotentayo a dana iti biagtayo. Ti masapul? Napasnek a kararag. Kanayon a pannakisarsarita Kenkuana.

Panagserbi. Masapul nga agserbitayo iti Dios. Sakbay pay kano a nayanaktayo, addan dayta wagas a naituding a panagserbitayo Kenkuana. Palugodantayo laeng kano ti Espiritu a mangiturong kadatayo.

Naynay manen a narigat iti ammotayo dagitoy a panagserbi. Wen, adu dagiti dumdumteng iti biagtayo a rigatentayo a kas paset ti panagserbitayo. Ngem laglagipen manen nga amin dagitoy, di nga impaay ti Dios no dina namnamaen a kabaelantayo. Ta Isuna laeng ti makaammo iti pudpudno a kabaelantayo nga aramiden.

No utobentayo a naimbag, dagiti amin a pasamak iti biagtayo—naragsak man wenno naliday—tulbekda tapno mabirokantayo dayta lugar a pudpudno a pagserbiantayo. Lugar pakaipariknaantayo ti ayat ti Dios a sagsagrapentayo.

Apagkirem laeng ti ilalasattayo itoy a biag. Apay ngarud a dadaelentayo laeng ti idadaw-astayo ditoy a lubong?

Kadaytoy ngarud baro manen a paset ti biagtayo, aramidentayo koma nga iti inaldaw a panagbiagtayo, addada dagiti kakabsat a matulongan wenno maparagsaktayo. Ta kuna met laeng ti Nasantuan a Surat a no tinulongan/sinerbiantayo dagiti kanunumuan a kakabsat, sinerbiantayo metten ti Dios.

Ala, kakabsat, Nabunga ken Nasalun-at a Baro a Tawentayo amin!