Footer

Peke a P1,000 bill, naipusta iti daduan

BANTAY, Ilocos Sur – Napidutna kano ti peke a kuarta nga impustana iti sugal, daytoy ti impetteng ti suspek a natiliwan a nangipusta iti peke a P1,000.00 iti maysa a natayan sadiay Zone 6 ditoy nga ili idi rabii ti Enero 5.

Pudno man wenno saan ti statementna kadagiti nangtiliw kenkuana, impatulod ti polis ditoy ti rekord nga illegal possession  and use of false treasury or bank notes and other instruments for credit maikontra ken ni Herminio Baldo, Jr. y Paz, 41, construction worker, ken residente iti Barangay Sacuyya Norte, Santa, Ilocos Sur.

Segun ken ni Baldo, naisurot laeng iti kaanakanna a maysa met a construction worker a napan nakisugal iti maysa a natayan sadiay Barangay Zone 6.

Kinuna ni Baldo a maab-abak iti dayta a kanito ket intudona nga impusta ti P1,700.00 a kuartana a pakaibilangan ti peke a sangaribu a pisos.

Naabak ni Baldo.

Idi bayadan ti kueme dagiti pusta, saan a makaanay ti P700.00 isu a sukatanna koma ti P1,000.00 ngem idi binidingna, naduktalanna a peke daytoy.

Tinengngel dagiti makisugsugal ni Baldo sada impaima kadagiti nagresponde a polis agraman ti kuarta nga addaan serial number  RM359020.

Bayat ti pannakapalutpotna, imbaga ti suspek a napidutna ti kuarta iti Bantay Arcade idi napanda nakitienda sumagmamano nga aldaw sakbayna.

Segun pay iti suspek, dinagdagusna nga imbulsa ti kuarta ket saannan a minira tapno penkenna koma no pudno met laeng a kuarta daytoy.#