Footer

Pigad

Maikadua a paset

Sarita ni Jobert M. Pacnis

 

 

Intugawko dita. Indisso ti empleado ti bagna. Idi kuan, inruarnan dagiti pag-retouch-na. Awanen ti bibiangna iti aglawlawna. Kasla awanak a kasangsangona.

Nakutimko laengen dagiti bibigko.

Sangapulo minuto ti napalabes sakbay nga inasikasonak

“Nakayanakam? inamadna.

Imbagak ti barangaymi.

“Birthday-m?”

“Hulio 25, 1978, ma’am.”

“Married?”

“Yes, ma’am.”

“Trabaho?”

“Awan, ma’am.”

“Dika man agsalsalawasaw!”

Naklaatak. Ngem pinasimbengko ti riknak. “Agpayso, ma’am,” inulitko.

“Rasonmo la dayta tapno makaliklikka iti dakdakkel a pagbayad! Trabahom?”

“Awan kunak met, ma’am,” impettengko.

“Saannakon nga allilawen. Dayta nga edadmo, awan pay?”

“Isu met ti agpayso, ma’am,” mangrugin a masemsemak

“Kasano ngarud a bibiagem ti pamiliam no awan pay?

“Adda idi ta nagisuroak kadagiti pribado a pagadalan,” kinunak nga agkubkubuar ti unegko. Diak pay gayamen naawagan iti ma’am.  “Ngem nagikkatakon ta pinadasko ti gasatko kadagiti public high school. Ti adatna, awan pay item. Isu a daytoy, awan pay trabahok!” indagsenko ti naudi a balikasko.

Pinababa-pinangatonak latta a kinita— a nakamisuot. Sa sinuratanna met laeng ti sedulak.

“Dayta, treinta la ngarud ti bayadam!” linapgisna ti sedula ket arig induronna nga impasayag iti sangok.

Ayna, diakto la ngata makapagteppel…

Masiudotak a rimmuar. Ania ketdin, aya, dagitoy nga empleado ta dida pay ammo ti nasayaat a kababalin. No kasano ketdi, a, a nakastrekda kadayta a trabaho.

Nagturongak iti Seguro Internet Shop and Photocopy center kalpasanna. Ipa-photocopyk dagiti pappapel nga iggemko: PDS (personal data sheet), TOR, PRC license, NBI clearance, certifications, omnibus, LET rating, service record, dagiti sertipiko kadagiti agduduma a seminar ken voter’s ID.  Sagtatallo a kopia. Ken ‘agpasiripak’ metten iti 2″ x 2″ a ladawan.

Nagadu manen a masapsapul. Napia ket itan ta inikkatdan dayta medical certificate, neuro test, drug test, ken blood test. Sadanto la kanon i-require ‘ton addan item-mo. Ngem kuarta latta met dagiti nagkaadu a masapsapul. Dagiti dadduma, masapul pay nga ipa-authenticate kadagiti maseknan nga ahensia. Dida mapnek uray ipakitam ti original. Masapulda kano latta ta maimarka nga AUTHENTICATE.

Naalay-ayan bassit ti semsemko iti taga-munisipio idi agpaalaakon iti ladawan. Adda pamuyaan ti mangretrato kaniak. No innipis koma, kartada otso a kas pagsasao dagiti sugador.

Kas nakunakon, tallo tawenen a pimmanawak iti pribado a haiskul ditoy ilimi. Tallo tawen metten a makiki-assessak iti public high school. Ngem awan latta ti gasat. Agmuriot payen ni baket iti rigat ti panagbiagmi.

No diak la ngata maka-substi-substi iti maysa wenno dua a bulan iti uneg ti makatawen, ad-adda koman ti rigatmi. Dagita ti pingpinggitenmi a gastuen; agraman ti sangkabassit a bayad dagiti sursuratek iti magasin. Pagyamyamanak pay ta adda met latta sumagsagud kadagiti isalsalipko kadagiti salip ti panagsuratan iti daniw ken sarita. Isu pay a nayon a panilpo iti anges.

Sinakayak manen ti motorsiklok kalpasan a nakapa-photocopyak. Nagdiretsoak iti Marin building iti sango ti maipatpatakder a baro a pasdek ti kuerpo ti polisia. Ni Atty. Utanes ti rantaek iti maikadua a kadsaaran. Isu laeng ti notary public ditoy ilimi. No idiay RTC, siamsiam ti abotem nga aguray. Baka didaka pay masango.

Nakayamanak ta maymaysa ti nadanonak a kliente ni Atty. Utanes. Madama pay ketdin a pirpirmaanna ti ranta daytoy.

“’Nia daydiay?” inyisem ni Atorni Utanes idi makitanak.

Bassit a lakay ni Atorni Utanes. Puraw aminen a buokna ken de-grado ti anteohosna. Ngem naparagsit pay laeng nga agkutkuti.

“Agpa-affidavitak koma, atorni,” kinunak.

“Para iti ikontesmo?” inamadna.

Napaisemak. “Koma, atorni,” kinunak. “Ken daytoy Omnibus a masapulko nga agaplay.”

Am-ammonakon ni atorni gapu iti pannakisalsalipko. Adda ngamin dagiti pasalip a kasapulan ti pirma ti abogado (kas koma iti Palanca awards). Wenno simple nga affidavit kadagiti lokal a pasalip a mangipakita a bukodko a putar ti isalipko. Ket isu amin ti pagpapaaramidak kadagita a rekititos dagiti pasalip. Dita met a naammuanna, siempre, a mannuratak.

“Kabasbasak ‘diay daniwmo a para ubbing,” kinunana idi nangdutdot iti bondpaper iti uyosan ti agkupkuplaten a lamisaanna (nga awan ti nakasurat a naganna a kas kadagiti dadduma a kasla mangipaspasindayag iti tituloda).

“Agyamanak, atorni,” inyisemko. “Agbasbasakayo gayam iti Bannawag…”

“Ay, wen, a,” napardas a sungbatna. “Indakdakkelko ti nagbasabasa iti magasintayo nga Ilokano.” Intudona dagiti magasin iti rabaw ti bassit a lamisaan iti suli ti opisinana. Nadumaduma a pagiwarnak, Reader’s Digest, Sign, ken Bannawag ti adda dita.

Ita laeng a makapatangko a kastoy ni atorni. Idi, no agpaaramidak iti affidavit, iti kaadu ti kliente nga agur-uray, pulos a dikami makapagpatang iti sabali malaksid iti rantak kenkuana. Matdaak lattan no dadduma nga aguray iti batangko iti ruar ti opisinana.

“Pakaragsakak dayta a naammuak, atorni,” kinunak.

(Adda tuloyna)