Footer

Ti Biometrics ken FOI bill

Komentario ni Melvin F. Bandonil

 

Kadagiti naglabas nga eksena politikal iti pagilian nangruna ti isyo maipapan iti PDAF, maysa a nakaituonan ti imatang ti rason dagiti naakusaran a nagibulsa  a saanda a pirma ti pirma a nakailanadan ti naganda. Kunada a natulad wenno adda nangtulad iti pirma. Peke. Saan a pudno.

Dayta ti rason.

Wenno palusot?

Gagangayen dayta nga eksena.

Ta kadagitoy a panawen makunan a ti pirma ket gagangay laengen a matulad. Pasurotan santo ulit-uliten nga aramiden agingga maperpekto. Dagiti nasanay a counterfeiters, matmatanda laeng ket nalakadan a tuladen ti pirma. Lalo kadagiti counterfeit artist sadiay Recto university wenno asino la ditan a makabael a manghukos pokus.

Isu nga iti kaso ti PDAF ket adu dagiti kuestionable a dokumento a nakailanadan kadagiti pirma. Dagiti pirma ti no asino a persona wenno dagiti lehitimo ken peke a personas iti NGO.

Ita, indeklara ti SC nga unconstitutional ti PDAF.

Maliklikan kadi dagiti kuestionable a transaction, dokumento ken dadduma pay?

Ti makunami, wen. Apay ketdin a saan?

Saan ngata a nasaysayaat no dagiti pampubliko a dokumento ket karaman ti thumb wenno index finger mark? Wenno dagiti katukadna a banag? Tapno makunan nga otentiko ti dokumento. Nalaklaka pay a paneknekan ti kinasigurado dagiti papeles ta gagangay met itan nga addan database ti biometrics. Ita a panawen ti digital era, addaan iti biometrics database ti isu amin nga umili.

Ti biometrics database ket masarakanen kadagiti nagduduma a pampubliko ken pribado a rekord. Kas iti Comelec, LTO, SSS, GSIS, iti kompania a pagtrabahuan, iti opisina ti gobierno ken dadduma pay nakaiyaplayan iti biometric database procedure.

Kadagiti agus-usaren iti paperless time-in ken time-out a pagtrabahuan ket saanen a mapaglibakan ti kinaotentiko ti kinaasino ti asinoman iti laeng panangiparabawna ti dakulapna wenno ti tanganna iti scanning device wenno ania la ditan a sistema ti device.

Ta ania ngamin aya ti makunkuna a biometric database?

Kastoy ti palawag manipud iti http://searchsecurity.techtarget.com: Biometrics is the science and technology of measuring and analyzing biological data. In information technology, biometrics refers to technologies that measure and analyze human body characteristics, such as DNA, fingerprints, eye retinas and irises, voice patterns, facial patterns and hand measurements, for authentication purposes.

Authentication by biometric verification is becoming increasingly common in corporate and public security systems, consumer electronics and point of sale (POS) applications. In addition to security, the driving force behind biometric verification has been convenience.

Nagduduma dagiti biometric devices. Ti finger print scanners ti kaaduan wenno gagangay a maar-aramat ta addaan pay iti reader ken addaan iti kabukbukodan a software a mangipatarus kadagiti na-scanned nga information ken ikompara iti kayat a beripikaren a banag wenno impormasion.

Babaen daytoy a proseso, makuna nga awanen dagiti peke a pirma, peke a papeles a rason wenno palusot kadagiti transaction. Nangruna iti gobierno.

Kadagiti dadduma, mabalinmo payen ti mangala iti dokumento uray no adayoka iti opisina a pangalaan ken mabalinmo metten a bayadan nga insigida ti maitutop a katukadna a serbisio.

No la koma ta iseriosoda a tamingen ti FOI bill, nalaklaka koma pay a mausig dagiti pampubliko a papeles ken dokumento. Mapukaw la ketdi dagiti kurimed ken mailimlimed ta nawayan ti asinoman a mangbusisi.

Napaspaspas met a dumteng ti panagdur-as.

No apay a saanda a kayat a tamingen, dayta ti ipasimudaag ti nakuttong wenno ampaw a bulsa.

Ipatungpal koma ti pagsayaatan ti kaaduan.#