Footer

2 ubbing, nalmes iti karayan

STO. DOMINGO, Ilocos Sur – Dua nga ubbing ti nalmes maigapu iti pannakatnagda iti karayan bayat ti panagay-ayamda sadiay Barangay Paras ditoy nga ili idi malem ti Enero 14.

Iti report manipud iti polis ditoy, nalmes da Gabriel Tacata y Tabion, 3, ken Chris Tabion y Fabo, 2, agpada a residente iti nadakamat a barangay gapu ta nakaruskosda bayat ti panagay-ayamda iti likud ti balay ti maysa nga Eric Tacata y Torrijas nga adda iti asideg ti karayan.

Iti insayangkat dagiti lumugar a search and rescue operation, naitakdangda ni Chris idi agarup 5:10 ti malem ken ni Gabriel idi agarup 6:00 ti malem iti dayta met laeng a petsa.

Naideklara dagiti dua nga awanen ti biagda idi maidanonda iti ospital.

Saan a nailanad iti blotter no sadino ti ayan dagiti nagannak dagiti ubbing idi napasamak ti insidente.#