Footer

Codicil

Kolum: Iti Duyog ti Singasing

Ni Jaime M. Agpalo, Jr.

(Umuna a paset)

 

Codicil daytoy iti kallabes a topiko maipapan iti intay panagsursurat iti radio iti sumagmamano (innem) a tawen, ti sabali pay a pamataudan pangbiag iti pamilia. Kayatko man a lagipen ditoy ti panagsursurattayo kadagiti drama para iti religious program ta adda met pakainaiganna iti biagtayo, nga iti naminsan, inobserbarantayo ti kabibiag dagiti estudiante sadiay Minor Seminary idiay Vigan, bareng no maaronan pay ti essemtayo ket posible a dayta ti ambisionantayo a pagbalinan iti masakbayan, ta pudno la unay a makaengganyo idi iti panagrekrutda kadagiti agpadi.

Nupay nawayakami a mannurat iti radio a mangsurat iti kapkapnekanmi nga idea, maedit pay laeng dagiti script—basaen nga umuna ti editor ti MPBC (ni Sis. Tessie) sakbay a maipatangatang. Ma-reject dagiti script a saan a pumasa iti editorial policy. Nasken a maibagay kadagiti naimbag a pannursuro ken kababalin ken umayon iti pannursuro ti katekismo Katoliko, ken kas paset ti mission vision ti radio station.

Nupay saantayo a napadasan ti na-reject, naminduan sa (he-he-he!) a napaayabanak iti opisina ti editor ket napalagipanak maipapan kadagiti dialekto wenno dagiti isuratko a balikas—nasken nga umayon iti naimbag a pannursuro, maliklikan dagiti dakes ken saan a nasayaat a balikas-termino ken saan a nasayaat nga eksena a posible a maikaited iti impluensia wenno tuladen  dagiti dumdumngeg, lalo dagiti ubbing a naganus ti panunotda..

No maminsan ngamin, adda dagiti eksena a pakaibuangan dagiti nadadagsen a balikas a mangkurikor kadagiti lapayag no di man panalpiitenna ti kimmot ket malipatan ti kinaasino ken kinaania ti pagsursuratan; sabali pay ti pannakairayo iti topiko ti sursuraten ket kaslan ‘tay alsado a nuang a ti la inna madaldalapus ken masarsari..

(Daytoy ti nakapaayabak. Iti agsurat iti makaparay-aw, ditay maaluadan no kua ti nakersang a dialekto, dagiti makaaprad karabukob a panagunget, dagiti makaspel a salitang-kanto, dagiti makalpay a termino tambay, dagiti mangibuyangyang iti kinababa ti kalidad dagiti balikas imbes a mangitag-ay ken mangidur-as.)

Ay, estrikto ti madre. Lalo kadagiti drama program a religious (Sunday program): tallo a para kadagiti Katoliko ken dua a para kadagiti Lutherans. Aggapu dagiti maaramid nga script a para kadagiti Katoliko iti missal sheet (pagbasaan wenno babasaen para iti misa). Translation dagiti drama a para kadagiti Lutherans, manipud Tagalog a mapan iti Iloko. Nalaklaka a suraten dagiti translation.

Kadagiti orihinal a manuskrito ti adda banbantotna a panunoten aglalo no agiray laeng ti suraten kadagiti mensahe manipud iti Nasantuan a Kasuratan ken kadagiti naimbag a kababalin, pannursuro ken talugading.

Iti drama a Biag ni Jesus, maipapan iti ebanghelio iti dayta a Domingo. Ilawlawag dayta nga ebanghelio ken no kasano nga iyaplay iti aginaldaw a panagbiag, panagilawlawag, panangiwanwan ken dadduma pay. Ti Dalan, Ti Pudno, Ken Biag ket maipapan kadagiti pannursuro ni Apo Jesus a nasken nga ipasagepsep kadagiti dumdumngeg, uray saan a nasisita a mangagsaw iti Biblia basta iparangna ti naimbag a pannursuro ken kababalin, a kas mapagwadan a Kristiano.

Ti nakitak a panglakagan no kasano ti panangsurat kadagitoy ket masapul nga agiray laeng, awanen ti sabali pay, iti didaktismo. Ti didaktismo ket kabangkagan ti panagsuratan a saan a pulos a maatianan.

(Maituloyto)

 

Comments are closed.