Footer

BANNER NEWS: Paltog masuspetsa a nanggudas 3-bulanna nga ubing, nakumpiska iti search operation

CAOAYAN, Ilocos Sur – Addan iti kustodia dagiti polis ti maysa a lumugar iti barangay ditoy ken ti paltog a masuspetsa a nanggudas iti biag ti tallo-bulanna nga ubing bayat ti selebrasion ti baro a tawen.

Naipan iti provincial police office para iti ad-adda pay a pannakapalutpotna ni Benecio Bilgera y Manzano, 39, residente iti Barangay Anonang Mayor kalpasan a nakakumpiska dagiti operatiba iti cal. 38 iti uneg ti balayna bayat ti search operation nga insayangkatda.

Kalpasanna, naipaima ni Bilgera iti police station ditoy bayat a maisagsagana ti kaso nga illegal a panagikut iti armas maikontra kenkuana.

Innem a balay iti Barangay Anonang Mayor ditoy nga ili ti sinukisok ti kapolisan kas paset ti agtultuloy a panagimbestigana no asino a gun owner ti nagpaputok idi kangitingitan ti selebrasion ti isasangbay ti baro a tawen a nakagudasan ti tallo-bulanna nga ubing a matmaturog iti uneg ti kuartoda.

Segun ken ni Caoayan Chief of Police Reynaldo Mendoza, Jr., negatibo ti resulta ti panagsukisok nga insayangkat dagiti nagtitipon nga elemento ti Caoayan Police Station nga indauluan ni Supt. Feliciano Gubatan, CIDG, ken Regional Intelligence Community kadagiti lima a balay ngem nakakumpiskada iti cal. 38 ti balay ni Bilgera a nagkarga iti uppat a bala iti cylinderna, ken sabali pay a 11 a live ammo ti nasukainanda iti kusina a naikabil iti plastic bag.

Ngem segun met laeng iti COP, impetteng ni Bilgera a dina ammo ti kaadda ti paltog iti uneg ti balayna.

Iti panangamiris dagiti ballistics experts iti bala a naala iti ulo ni Von Alexander Llagas y Quemi, tallo-bulanna nga anak da  Alexander Llagas y Quemi ken ni Vanessa, residente iti Barangay Anonang Mayor, maysa a cal. 38 wenno 9mm pistol ti nagtaudan ti bala.

Segun pay dagiti inbestigador, naiputok ti bala iti agarup 100 metro ti kaadayona manipud iti pagtaengan dagiti Llagas.

Nupay kasta, kinuna ni Mendoza a saanda nga ibilang a suspek ni Bilgera iti pannakatay ni Llagas agsipud ta masapul pay a maiwayat ti ballistics examination ken cross-matching iti nakumpiska a paltog iti bala a naala iti ulo ti biktima.

Ngem innala latta dagiti otoridad ni Bilgera agsipud ta awan ti maipakitana a dokumento a lisensiado ti nasao a paltog.

“Awan ti naiparangna a lisensia… tsinek met ti Firearms and Licensing Division ngem awan ti nakitada a nakalisensia a paltogna,” kinuna ni Mendoza.

Sakbay daytoy, maysa a task force ti binuangay ni Ilocos Sur Provincial Director Jemar Modequillo a mangiwayat iti naun-uneg nga inbestigasion para iti madagdagus a pannakasolbar ti kaso ti pannakatay babaen ti stray bullet ti tallo-bulanna nga ubing.

Nangitanggaya met ni Gov. Ryan Singson iti P250,000.00 a gunggona iti asinoman a makaited iti impormasion para iti pannakaitudo ti nagpaputok iti paltog a nanggudas ken ni Llagas.

Sangapulo ket maysa nga agtagikua iti paltog a residente iti nadakamat a barangay ti nangisuko iti paltogda iti polis tapno maamirisda no naiputokda idi selebrasion ti baro a tawen.

Karaman a boluntario a naisuko ti paltog dagiti uppat a kameng ti Bureau of Fire Protection a mapapati nga adda iti bisinidad iti dayta a rabii.

Immannugot pay dagiti uppat a fireman a mapakatanda iti paraffin tests ken ti paltogda para iti ballistics examination.

Kinuna ni Mendoza a naiyisioan ni Bilgera iti search warrant kas resulta iti inwayatda a naun-uneg nga inbestigasion ken panagkalapda kadagiti impormasion kadagiti lumugar iti asideg ti pagtaengan dagiti Llagas.#

 

Comments are closed.