Footer

Paltog, nasarakan iti basura

VIGAN CITY – Maysa a paltog ti insuko ni PO3 Arthur Torricer, nakadestino iti Police Regional Office 1, ken residente iti Barangay Camestisoan, Sto. Domingo, Ilocos Sur, iti police station ditoy siudad idi Enero 13.

Segun ken ni Torricer, pampanurnoren ti motorsiklona ti Florentino St., Vigan City, iti dayaen a paset ti Dudley Lara Learning School idi nakitana ni Rufino Racadio y Rafanan, 52, naasawaan, ken residente iti Barangay Pantay Fatima a nakaiggem iti nasao a paltog.

Dimsaag ni Torricer sana inyam-ammo ti bagina.

Imbaga ni Racadio a nasukainanna ti nasao a paltog, maysa a Gauge 12 Shotgun a nagmarka iti Squiresbingham, iti basura a nabungon iti ikamen sana inyawat daytoy iti polis.

Adda itan ti paltog iti kustodia ti Vigan City Police Station para iti dokumentasion ken disposision.#