Footer

Pigad

Sarita ni Jobert M. Pacnis

Maudi a paset

 

“Kayatak man a basbasaen ‘diay kolum ni Judge Costales,” intal-ona ti anteohosna idinto nga impakanna iti makiniliana (wen, saan nga agus-usar iti kompiuter) dagiti tallo a bondpaper nga adda carbon paper iti nagbabaetanda. “Nagmayat man ti panagipatarusna iti Iluko. Kasla koma ‘diay plaintiff… agidardarum.”

Apagisu a malpasna dagiti rantak idi simrek iti opisinana ni Konsehal Cenal a kabarioak idiay Caiingat Cayo. Nakapetpet iti nalukot a pappapel.

“Naimbag nga agsapam, abogado,” inkablaawna.

“Kasta met,” insubad ni atorni. “Agtugawka…”

“Tenkiu, abogado.” Inabaynak ni Konsehal Cenal iti pang-uppat a tugaw a narra iti sango ti lamisaan ni Atty. Utanes. “Addaka met, barok,” intaliawna kaniak. Mapanen a singkuentana. Nabaneg a napudaw; adda panagkakaingasda ken JV a putot ti dati a Presidente.

“Wen, konsehal. Umayak agpa-affidavit,” insungbatko.

“Atoy met SALN-ko ti papirmaak ken ni abogado,” kinunana. “Narigat no diak agipasa ta madaksanak, di kadi, abogado?” inkitana ken ni Atorni tanes.

“Ay, wen, a!”

“Pagtrabahuam itan?” sinaludsodna kaniak.

“Awan, konsehal,” kinunak.

“Di met nagisuroka dita CHS?” ti naggapuak a pribado a pagadalan ti kayatna a sawen.

“Wen, konsehal. Ngem nagikkatakon; tallo tawenen ti napalabas.”

“Ania ngarud itan?”

“Madamaak nga agpapa-assess iti pampubliko a pagadalan, konsehal.”

“Kaano pay?”

Imbagak. “Isu ngarud dagitoy ipagpagnak manen a pappapel, konsehal.”

“Alla, apay a dika pay nakastrek?” immulagatna. “Nabayagka met gayamen nga agap-aplay!”

“Wen ngarud, konsehal. Ngem anus laeng, a.”  Pinasarunuak met iti sennaay.

“Umaykanto man ken ni mayor ta isaritaka kenkuana,” ni Mayor Alvarez ti kayatna a sawen. “Isu ti makaammo a makisarita ken ni Ma’am Biz,” ti prinsipal ti alma materko ken pagap-aplayak a mannursuro ti kayatna a sawen.

“Apay, masapul pay, aya, ti rekomendasion, konsehal?” inamadko.

“Wen, a.”

“Ket no adda met dayta assessment a pakarankinganmi. Mairamanto lattan iti RQA dagiti naganmi.” Rooster of qualified applicants ti kayatko a sawen. “Ket no adda makasapul a pagadalan iti mannursuro, kitaenda laeng ditoy no asino ti maitutop a maiserrek.”

“Ayna, awan, a, no kasta ti panagkunam. No gobiernonto met laeng ti serkam, masapul latta dayta ikakapetmo kadagiti politiko.”

Napamulenglengak. Naestoriak la ket ngarud ti kapadasak. Idi damok ti maki-ranking, sisiak laengen ti Math major iti asideg, uray payen iti cluster a nakaibilangan ti ilimi, para iti nabakante a PSB (provincial school board) iti alma-mater-ko. Naikkan ngamin iti item ti maestro nga akin-iggem itoy kadayta a bulan ti Disiembre. Ti ammok idi, siakon ti maawagan a mangala iti kina-PSB-na. Ngem nasdaawak laengen idi nadamagko nga adda naala a sabali. Ti dakesna, saan a naki-assessment. Nairana kano laeng a napan idi nagipasa (Disiembre) iti papelna para iti sumaruno nga assessment kadayta nga Abril.

Riniknak daydi. Siak a naki-assess, ken adda laeng iti aglawlaw, ken nagturpos pay iti nasao a pagadalan, saandak man la a nalagip idinto a sisiak metten ti bakante kadagiti lima a kaduak a Math major iti clustermi.

“Nakitam?” inyisem kaniak ni Konsehal Cenal. “Napolitikaka dita. No apay a naiselsel dayta a kunkunam, gapu ta adda la ketdi nangbak-ap kenkuana.”

Ngem di latta maaklon ti riknak ti ibagbagana. Ipetpetteng latta ti panunotko a makastrekakto latta iti bukodko a panglakagan. Saan ketdi a gapu iti rekomendasion dita ti asino man a politiko!

“Isu nga umaykanto dita munisipio ta kaduaenka ken ni mayor,” kinuna manen ni Konsehal Cenal idi dinak nauray nga agsao. “Uray kasano kakualipikadoka, kunak manen, iti dayta ap-aplayam a trabaho, no gobiernonto met pay laeng, dikanto makastrek no saanka nga umamo kadagiti nabibileg. Saan ketdin, abogado?” inkitana ken ni atorni.

Immisem laeng ni Atorni Utanes.

“’Nia, umayka madamdama ta kuyogenka? Wenno umasidegkanto ‘ton umay ti grupomi ag-assembly meeting idiay barangaytayo. Asitgannakto a tugotmo dagiti pappapelmo ta kapatangta ni mayor.”

Saanak a nakatimek. Ta talaga a di maaklon ti riknak ti dumilpat iti sakaanan dagiti politiko tapno laeng makastrekak iti trabaho. Ken apay nga ita pay a masungad ti basingkawel a malagipnak? Kanayonkami met nga agdaydayanggos idiay bariomi.

“Sige, konsehal, umayakto…” kinunak lattan. “Ipagnak pay dagiti dadduma a masapsapulko.”

“Urayendakanto ngarud.”

Kunayo la dayta ta panagpipili man metten, nakunak laengen iti nakemko.

Kalpasan a nakapagyamanak, ta dinak manen pinagbayad (a nangrugi pay idi naam-ammonak a mannurat), ken ni Atorni Utanes, nagpakadaakon.

“Agbayadkanto no addan trabahom,” sangkakunana.

Iti iruruarko, nataldiapak ti pagpigadan iti ridaw. Nalagipko la ket ngarud ti naikugtarko itay a pagpigadan ‘diay balay.

Ket kasla nakitak a nailamina dita ti rupa ni Konsehal Cenal ken ti empleado a nagpasedulaak itay.

Dinardarasko ti immulog. Ipagnak ketdi latta dagiti papelko iti bukodko a panglakagan!

No awanto latta, anus latta. Ken anus latta a dumngeg kadagiti sasao ni baket. Ta no kariarem ti baket, awan ti kakinnepkep!#

 

Comments are closed.