Footer

TV repairman a nangpaltog iti kalib-inna, birbiroken ti polis

VIGAN CITY – Saan pay a simmuko iti polis ti maysa a nga agtartarimaan iti telebision a nangpaltog iti kalib-inna nupay imbatad daytoyen a pinakawannan ken saanen nga agdarum pay.

Bayat a masursurat daytoy, saan pay a nabirokan dagiti polis ni Erick Hernandez y Singson, 42, ken residente iti Barangay 1 ditoy siudad iti baet ti pakaasi ni Maricel Escoto y Bales, 42, natibo iti Barangay San Nicolas Block 4, Tarlac City, ambulant vendor nga agdama a residente iti Barangay VII.

Naglibas ni Hernandez kalpasan ti panangpaltogna ken ni Escoto bayat ti panagringgorda iti uneg ti kaserada sadiay Barangay VII idi agarup 10:10 ti rabii ti Enero 14.

Immuna a naitaray ni Escoto iti Rabara’s Clinic and Hospital gapu iti sinagrapna a sugat iti makannigid nga imana sa naiyalis iti Gabriela Silang General Hospital.

Nupay naideklara ni Escoto nga out of danger, kasapulan a maopera tapno maikkat ti bala a nagbati iti imana.

Mapapati a pinansial a problema ti ramut ti saan a panagkinnaawatan dagiti dua.

Iti interbio kenkuana ni Jun Ramos ti DWRS, kinuna ni Escoto a saan nga inggagara ti asawana a paltogan.

Kinuna ni Escoto nga inkasa ni lakayna ti paltog saan a tapno paltoganna no di pangbutbutengna laeng.

Saan a narekobre ti paltog ket pattapatta dagiti polis nga inkuyog ti suspek daytoy iti panaglibasna.

Kasta met a saan nga ammo ni Escoto ti nangalaan ni lakayna iti nasao a paltog a mapapati a pinatarimaanna tapno ilakona.

“…pinasimpana tapno ilakona tapno uray no kaskasano, adda met bassit maganansiana,” kinuna ni Escoto ken ni Jun Ramos bayat ti interbiona a naipatangatang iti DWRS itay lawasna.

Kinuna ni Escoto a sisasagana a mangpakawan iti kalib-inna ket indagadagna ti panagsublinan kadakuada nga agiina.

Addan lima nga annak dagiti dua iti panagdennada. Duan kadagitoy ti simminan iti paggianan ta adda metten pamiliada.

Ngem iti report ti polis ditoy siudad a naiggaman ti Tawid News, karaman dagiti dua iti listaan dagiti drug personality ditoy siudad.#

 

Comments are closed.