Footer

Bulsek a baket, natay gapuen pannakauramna

SANTA, Ilocos Sur – Pimmusay ti maysa a baket tallo nga aldaw kalpasan a nagsagrap iti sugat iti bagina maigapu iti pannakauram ti badona  bayat ti kaaddana iti uneg ti balayda sadiay Barangay Sacuyya Sur ditoy nga ili idi malem ti Enero 24, 2014.

Iti naladaw a report iti police station ditoy, impatay ni Lucena Galinato, 90, baak, bulsek, dagiti sugatna maigapu iti pannakapuor ti pagan-anayna.

Segun iti panagimbestiga dagiti polis, mapapati a nagtabako ti biktima ket natinnag ti  beggang manipud iti tabakona a nanguram iti lupotna ken iti biktima.

Mapapati a naangot ni Anastacio Galinato, bayog, 82, bulsek, nga adda mapupuoran  ket inayabanna ti kaarrubada a ni Herminia Pita, 69.

Idi simrek ni Pita, nakitana laengen a mapupuoran ti aruaten ti baket ket dinagdagusna a binuyatan iti danum.

Nagkedked ti kabsatna a ni Anastacio a maipan daytoy iti ospital agsipud ta awan ti pagpaagasna.#

Comments are closed.