Footer

Codicil

Kolum: Iti Duyog ti Singasing

Ni Jaime M. Agpalo, Jr.

 (Maikapat a paset)

 

No saanka met a naragsak nga agsakripisio, saanmo a lubong ti kinapadi!

Dagiti nakapagpadi ket isuda dagiti sidadaan a mangidaton ti biagda, nga awanen ti sabali a linaon ti panunot ken pusoda. Daytoy ti pagragsakanda.

(In some cases, uray dagiti padi no saanda a naragsak, nawayada latta a manguksob iti abitoda, panawandan ti bokasion, a kas met laeng kadagiti madre. Isu nga adda dagiti sumagmamano a kaso a nanguksob iti bokasionda, ket inarakupda ti sabali a pay dana ti biag. Adda nagasawa, simrek iti negosio wenno politika. Iti Doktrina Kristiana Katolika, sakbay a desdesem ti sabali a dana, uksobem pay nga umuna ti bokasionmo, agretiroka wenno ag-leave of absence. Dagiti nanguksob iti bokasiondda, saanda a mabalin nga usaren ti dayaw a kas padi wenno ti termino a “Reverend Father” sakbay ti naganda, a kas iti mayor idiay Bicol ken bokal iti Benguet ken dadduma pay. Dagiti laeng nagretiro wenno addaan iti leave of absence ti mapalubosan a mangusar, saan kadagiti nagrebelde iti gobierno gapu iti kinaruker, kinabukatot, kurakot ken kinaranggas kadagiti umili kas kadaydi Fr. Zacarias Agatep iti Ilocos Sur, Fr. Conrado Balweg iti Cordillera ken dadduma pay a padi a nangdesdes iti armado a dangadang iti panangisakit kadagiti babassit nga umili iti masakupanda a parokia.)

Ita, damagek man, kayatyo pay ti agpadi wenno agmadre? Kayatyo ti super sakripisio? Wenno kayatyo ti extreme sakripisio isu a surotenyo ti desdes a nagnaan ni Apo Jesucristo?

Kabukbukodanyon dayta a pangngeddeng.

Kadakami, makapaserbika met iti Dios a Mannakabalin amin uray no saanka a padi. Ti panagbalin a naimbag nga ama, napudno a gayyem, kas umili a manakem, kas mannurat iti nalinteg nga adal ken sursuro ken dadduma pay nga addaan iti nasayaat nga aramid, sursuro ken ugali ket panagserbin iti Dios dayta a banag. Adu a wagas ti panangipakita iti panagayat iti Namarsua. Saan laeng nga iti balikas no di ket iti aramid. Saan nga ipasindayag wenno iwarwaragawag ti panagserbi no di ket naulimek laeng,  kaiyariganna ti naulimek a danum iti karayan, ngem naadalem; saan a kas iti narabaw a karayan ta kumarasakas, saan kadi?

Saan a propesion ti kinapadi no di ket bokasion. Dakkel a sakripisio. Awan sueldo ti padi a Katoliko, no di laeng ti sipupuso ken pudpudno a panagserbi iti Dios. Saan a mangasawa ti padi a Katoliko tapno maipamaysana ti aramidna—maymaysa laeng ti turongen ti konsentrasionna. Dagiti laeng makaserrek ken makaruar nga agsublisubli nga awan sawsawirna iti abut ti dagum ti makapagpadi a Katoliko.

Ti minor seminary, katukadna ti sekundaria. Ti major seminary katukadna iti kolehio a pangipangpangrunaan iti panagadal iti pilosopia. Maarisitto manen ken matingiting no rumbeng wenno saan nga ituloymo ti teolohia. Maamiristo manen no rumbeng a patuloyen, no narangrang ti panangtungpal iti awag, saan nga aggudeng agingga a dumteng ti ordinasion. Adda met ti makunkuna a masteral a pangipangpangrunaan iti agadal iti teolohia.

Dua pay a klase ti padi, dagiti mangaywan kadagiti simbaan (parish ken diocese) ken ti misionero.

Dayta maikadua ti nakaituonan iti essemtayo idi, gapu iti impluensia dagiti CICM wenno ti Congregatio Immaculati Cordis Mariae wenno ti nalatak unay a Congregation of the Immaculate Heart of Mary, maysa a Roman Catholic missionary a binuangay ti maysa a padi a taga Belgium idi 1862, ni Father Theophile Verbist (1823-1868)

(Maituloyto)

 

Comments are closed.