Footer

EDITORIAL: Cybersex ken Child Pornography

Cybersex ti ngumayngayebngeb a damag a nangtiritir iti tengnged ti lubong ket minulagatanna ti pagilian. Mapapati a ti pagilian ti key hub ti billion-dollar global child cybersex industry. Natakuatan ti Interpol a nagraira dagiti pedophile ring babaen ken ni ‘Sweetie’ iti computer-generated image ti agtawen 10 nga ubing a nangtiktikanda kadagiti online child abusers.

Immay iti pagilian dagiti pannakabagi ti linteg manipud Australia, US ken Britania tapno idauluanda ti inbestigasion nga Operation Endeavor. Naraut ti Brgy. Ibabao, Cordova, Cebu  nga umok dagiti cybersex dens. Sinaruno ti panangraut ti NBI operatives iti call center iti Quezon City nga operator ti cybersex racket, kem pannakatiliw ti pangulo ti Chinese-led syndicate a ni Mei Yi, a makinkukua iti Filipina Heart Internet Consultant iti Cebu City. Ngem adayo pay ti daliasaten ti dangadang ta natakuatan a 31 a probinsia ti pagtataudan iti streaming, kangrunaanna iti Angeles City, Cebu ken Cagayan de Oro.

Malaksid iti kinarigat ti panagbiag, adda pay dagiti makaited iti impluensia tapno agraira ti cybersex. Kadagiti bangketa, nakadispley dagiti magasin ken tabloid a nabaduan iti pornograpia. Naregta ti pannakailako dagiti  DVD dagiti nagduduma a sex scandal ken sex video. Sabali laeng dagiti nagduduma nga adult toys a mailaklako.

No ar-aramiden dagiti dadduma, uray pay no natirad a patadem kapten met dagiti mabisbisinan ken makurkurangan iti kasapulan. Awanen ti sabali pay a pagpilian a mangsilpo iti kasapulan tapno makalung-aw iti nakaimamegan a sakuntip. Survival is name of the game,  kunada. Daytoy ti rason ti kaaduan a tumapog itoy. Bassit laeng a porsiento dagiti mangaramid gapu iti panangsuportada iti bisioda, adbentura ken kaadda ti nangiluod kadakuada.

Nalipatanna ti DSWD nga imutektekan daytoy pagtataudan ti puling iti rupa ti pagilian wenno inabbongan ti nangisit nga ulep ti init a mangmulmulagat iti billion peso a CCT.

Kunaenmi ketdi a dagiti addaan iti nalidem a sirmata ken negatibo ti linaon ti panunotda a makidangadang iti biag dagiti kimmubukob itoy a klase ti panagbiag. Adda met dagiti positibo nga aramid a maitutop a kaptan. Adun dagiti nakurapay idi a rimmang-ay, isuda dagiti saan a timmukma iti awis a panangibelleng iti dayaw ken kinatao. Ti panangkagat iti patadem ket saan a sungbat ti duog a parikut.Ti preperensia a kayat a pagbanagan wenno aramiden iti masakbayan ket naipalay kadagiti abaga.#