Footer

Lalaki a napan nakiminatay, pinatay dagiti armado a lallaki

STA. LUCIA, Ilocos Sur – Napan nakiminatay ngem isu metten ti simmaruno a maimassayag kalpasan a pinaltogan ti dua a lallaki idi pumarbangon ti Pebrero 4.

Dagus a natay ni Perlito Vilog y Imatong, 40, naasawaan, ken residente iti Barangay Nagrebcan, ditoy nga ili gapu kadagiti innem a sugatna iti nadumaduma a paset ti bagina maigapu iti pannakapaltogna.

Segun iti inisial a panagimbestiga dagiti polis, napan nakiminatay ni Vilog, kaduana ti anakna ni Levi Irish, 13, idi kellaat a nagparang dagiti di nabigbig a lallaki ket pinaltoganda ti biktima sumagmamano a daras a nakadaleban daytoy.

Maysa kadagiti suspek ti nangiyebkas iti: “Alaem diay paltogna ken selponna” kabayatanna ti panangpaltog latta ti maysa iti biktima.

Naglibas dagiti suspek, kuyogda ti paltog ti biktima a cal. 45 pistol ken ti selponna.

Nakasarak ti SOCO team a nakabase iti Candon City ken ti Sta. Lucia police iti nakapasamakan ti crime scene iti dua a kita ti naiputok a cartridges a mapapati nga 4 a kapsula ti cal. 45, 2 kapsula ti cal. 9mm, ken 2 a buli ket addan dagitoy iti kustodia ti SOCO para iti ballistics examination.

Nakasarak pay dagiti inbestigador iti maysa a magasin ti cal. 45 a nagkarga niti 7 a bala iti diaket ti biktima.

Iti autopsia a naisayangkat iti biktima, tallo a deformed slugs ti naala iti bagi ti biktima.

Naipatulod dagiti kapsula a nasarakan iti crime scene ken iti tallo a deformed a buli a naala iti bagi ti biktima iti crime laboratory iti Candon City para iti ballistics examination.

Saan pay nga ammo ti motibo iti pammapatay.#

 

Comments are closed.