Footer

Nagpabigbig a kameng ti militar, paltog ti pagbayadda iti nainomda

CANDON CITY – Gapu ta awan ti pagbayadda iti nainomda iti maysa a bar sadiay Barangay Paras, ditoy siudad idi rabii ti Pebrero 4, paltog ti kayat dagiti dua a nagpabigbig a kameng ti militar a pagbayad iti nainomda.

Resulta: intimbre ida ti menedier iti polis ket nagresponde dagitoy a puon ti nakatiliwan dagiti dua a suspek.

Segun iti report manipud iti polis ditoy siudad, tiniliwda da Teddy Morales y Peduche, 48, naasawaan, ken residente iti Barangay Amguid, ditoy siudad, ken ni Gerry Ballocanag y Ramos, 41, naasawaan, ken residente iti Barangay Nagsingcaoan, Galimuyod, Ilocos Sur kalpasan a nagreklamo ti manedier ti Apple Disco Bar a naginoman dagiti dua agsipud ta paltog ti pagbayad dagitoy iti nainomda.

Segun iti polis, kayat nga ibati ni Morales ti paltogna a Super 38 Llama pistol nga addaan iti magasin a nagkarga iti 9 a bala a kas collateral gapu ta dida mabayadan dagiti nainomda.

Nagpabigbig ni Morales a maysa a kameng ti military ket impakitana ti identification cardna ken ti mission order nga inyisio ti 73rd Military Intelligence Company, 7th Infantry (Kaugnay) Division, Phillipne Army based at Camp President Elpidio R Quirino, Bulag, Bantay, Ilocos Sur.

Nagpabigbig met ni Ballocanag a kameng ti intelligence ket impakitana ti IDna a kas confidential agent ken mission order ken mission order a naggapu met laeng iti nasao a unit ti PA.

Ngem nagpason dagiti ID ken mission order a nayisio kadagiti dua.

Nakakumpiska pay dagiti polis manipud ken ni Ballocanag iti maysa nga Ithaca M1911 Cal. 45 pistol nga addaan iti magasin a nagkarga iti pito a bala.

Naipan dagiti suspek iti police station agraman dagiti nakumpiska a paltogda para iti umisu a disposision.#

Comments are closed.