Footer

Osang, Sabali pay nga Inspirasion

Kolum : Sinursuran

Ni Jobert M. Pacnis

(Tuloyna)

 

Ita a masursurat daytoy, agsagsaganan ni Osang iti panagawidna ditoy pagilian tapno sarungkaranna dagiti ipatpategna ken personal a makapagyaman kadagiti nagtalek kenkuana a kailianna.

Sabali manen daytoy nga inspirasion kadatayo a puli. Iti nagkaadu ti nakagunggonantayo iti naglabas a tawen, agsapsapultayo kadagiti pagteng a mangnayon iti pigsa ti pakinakemtayo tapno agtultuloy latta ti pannakirangettayo kadagitoy a pannubok.

Ta no urayentayo dagiti agtakem, baka manayonan laeng dagiti dagensen a marikriknatayo. Kanigid-kanawan dagita isyo a pakairamramananda a naynay a pakairarraremantayo a babassit.

Kanigid-kanawan met a pammadayaw ti impaay kenkuana dagiti kailian idiay Israel. Kinapudnona, napili a kas Outstanding Filipino iti Israel gapu itoy di magatadan a pammadayaw nga impaayna iti pagilian.

Nupay kampeon, saanna pay laeng a naan-anay a nagun-od ti balligi ta dina mabalin ti agbalin a maysa a recording artist. Gapu dayta ti work visa-na a nakalanad dita a masapul nga agtrabaho a kas caregiver ket dina mabalin ti agtrabaho iti sabali.

Nupay kasta, saan manen a maaw-awanan iti namnama ni Osang. Mangnamnama a maikkan iti special visa tapno maikkat ti restriksion iti panagbalinna a recording artist.

Narikut daytoy. Ngem iti kinadeterminadona, ammona a magun-odna daytoy nga ar-arapaapenna iti asideg a masakbayan. Makita ken mariknana a mismo a dagiti umili iti Israel ti agreklamo wenno agprotesta no di makapag-recording artist idinto a kampeon iti salip ti kinnantaan. Kasta ti kinapategna kadagiti agindeg iti sinangbayanna a pagilian. Inayon pay dita ti suporta ti adda iti likudan ti X-Factor.

Napintas ti ipamatmat daytoy. Nupay kasunganina iti puli dagiti umili, ipakitada laeng a dida kitkitaen ti puli, ti maris a nagtaudan. Addaan iti tunggal maysa ti agpapada a kalintegan. No agrukbos daytoy nga ugali iti sangalubongan, ania ket ngatan a nagpintas, ka-Sinursuran!

Ngem anian, aya, a nagsakit ti kinapudno nga adda latta kadatayo daytay makunkuna a crab mentality. Mismo a kamarmaristayo, kadaraantayo, kayattayo nga imameg, guyoden nga ipababa tapno laeng di agballigi iti biag. No ket koma ta idurontay’ pay dayta a kailiantayo a rumimbaw tapno iti masakbayan, isu met ti tumulong kadatayo.

Ngem baginan, ikalukagna met. Uray asino dayta mabaddekan. Wenno mailupitlupit. Kas koma kadagiti am-ammotayo a permi ti panagkabukabda kadagiti para kadatayo nga umili. Piman ta pati para kadagiti biktima dagiti kalamidad, iramanda latta a ngatingaten.

Nakababain man kadakuada no dida agkittab iti pondo no addadan iti puesto!

Nagmayat dagitoy a litaken!

Ngem bassittayo la ngamin iti imatangda. Awan maaramidantayo.

Ania ngata no dagitoy ti biktimaen dagiti riding-in-tandem wenno holdaper a nakahelmet? Agragsak met ngata dagiti pada a babassit?

Tsk-tsk-tsk! Ti la adda a sumsumrek iti panunot no kastoy. Aglalo ket nagadu a binabaliktad a mapaspasamak. Kas iti international airport ti pagilian, awanan iti CCTV idinto nga adda pay kadagiti lugawan ken gotohan. Asino met ti di agpungtot kadayta.

Sa ita, nagwaras manen ti parikut iti maiparit nga agas. Nagdadakkel dagiti laboratorio a pagaramidan iti droga a rarauten dagiti otoridad. Napintas la unay nga addang. Ti manen makapangato iti presion ti dara ditoy, ‘tay maysa a naduktalan a ti lote ken balay a pakaar-aramidan dagiti maiwaras a maiparit nga agas ket kukua pay ti maysa a politiko. Anian!

Ala, naimbag la ketdin ta adda kasla ken ni Osang a kailiantayo a mangmangted iti balanse dagiti paspasamak iti pagilian. Isuda koma ngarud ti pangasutantayo iti naidumduma a kired ken determinasion tapno uray kasano dagiti sangsanguentayo a parikut, adda latta pigsatayo a sumaranget.

Kailian Osang, maysa a naimpusuan a saludo kenka! Umadu koma pay dagiti kadaraan a kas kenka a makaited iti dayaw ti pagilian, ti puli ni Pinoy.#

Comments are closed.