Footer

Managparabur ni Ikit Banang

Sarita ni Danilo S. de Guzman

Maikapat a paset

 Kasla kinirog nga udang ti rupa ni Nang Filing iti pannakatiliw ti aramidna a panangibulsa iti namanteka nga adobo. Agsalsala dagiti matana kadakami nga aggagarakgak. Uray la agsisinnipat kada agkikinnuddot dagiti babbaket, ket nairayo metten ni Olan a kunam la no kumarengkeng a makidinnuron iti garakgakna. Ti sinalbag a lalakin, ket intallikudko manen ti saan pay laeng a napugsat nga eellekak.

Ania la ketdin ti mapaspasamak iti purokmi? Mapasamak uray ti saan a namnamaen a mapasamak!

“Ilaklak-amna met a, ni Kumpari Saming! Naimbag la nga ikammetna no rabii, saan mari?” ni Nang Ising ti nagtimek, ta di met la sumardengen a gumarikgik dagiti babbaket ken ni Olan.

“Isu met. Kaasi met piman ni Saming a lakayko no sisiak laeng ti makaraman iti imbag. Pagraranudan a, ti imbag, saan, Ambot?” tinaliawnak ta apagisu manen a sumangoak.

“Husto dayta kunam, Nang Filing, pagraranudan a, ti imbag. Kas ken ni Ikit Banang, napagasatan a nangabak iti hueteng, imparanudna ti imbag kadatayo, saanna nga inyimut!” nakunak.

Uray la kas karaniag ti agmatuon nga init dagiti mata ni ikitko isu a napanunotko pay a silpuan ti boladasko a kagiddan ti panangpidutko iti bassit a baso tapno tumagayak met: “Dayta a! Uray no maymaysa ti ikitko no managparanud!”

“Ala, dikay madanagan, no adda la ketdi, apay ketdin a saantayo nga agraragsak? Kukuayo ti sammigel ta kukuak met ti naimas a pulotan!” impatangad ni ikit ti kanawan a tanganna.

KABIGATANNA, Domingo. Da Uliteg Sebing, Victor, Kanor, Tomas, Ponang, ken Olan dagiti kaduak nga agtutugaw iti sanguanan ti tiangge ni Nang Ising. Ti nagmimitinganmi a mannalon idi kalman ti topiko. Napasungadanmi ni Ikit Banang.

“’Tay baraton a, kasinsin!” impasabat a dagus ni Uliteg Sebing.

“’Tay barato, ninang, ramananmi man met! Awan la ti nayonnan ‘tay pinulotanyo nga adobo ken lauya a kukod ti baboy idi kalman!” inggagarakgak met ni Victor ket nagparang dagiti dua a balitok a ngipenna.

“’Nia a barato ti ibagbagayo?”

“Nangabakka kano iti hueteng idi kalman, ninang, ket linanitam ti subsob da Nang Masang, Nang Filing ken Nang Ikka!”

“Adda met bassit a pinaghapihapimi.”

“Awan la ti nayonnan, kasinsin? Ramananmi met a! Pagraranudan ti imbag, tapno ti grasia ket kanayon nga in da bag!”

Agsaringgayad iti daga ti isem ni Ikit.

“Sigen a, ninang,” sinallabay ni Victor ni Ikit Banang sana pinekpekkel ti abaga daytoy.

“No malem. Innak ita idiay tiendaan.”

Naragsakan dagiti padak a lallaki. Sigurado la ketdi nga umatipukpok manen ti innangaw, diskusion, argumento ken kontra argumento dagiti babbaket ken lallakay iti purok. Ragragsak manen ket sigurado la ketdi a dumlaw dagiti agtutong-it ken agbibingo. Aldaw ti Domingo ita ket saan a tumapog iti talon ken bangkag ti kaadduan a pumurok, panaginana a kunada.

“Kukuayo ti sammigel ket  kukuak ti pulotan! Bareng no adda oriles ta agkilawtayo! “Innak ita idiay tiendaan ta kaaduna kano ita iti lako nga oriles!” impatakder ni Ikit ti kanawan a tanganna. “Apay dagita la Haponen ti nalaing a mangan iti sashimi? Ilokanokami a mannangan iti sashimi!” imbungisngis ni Ikit.

“Ayos! Adu pay la ti wasabi idiay balay a pagsiwsiwantayo!” binagi ni Kanor.

“IPRISERMO, kasinsin, tapno dida malaes,” inyawat ni Ikit Banang ti uppat a kakasla gurong nga oriles wenno blue fin tuna ken ni Uliteg Sebing. No mano ti bilangmi a pinanawan ni Ikit, kasta met laeng ti bilangmi a nasangpetanna nga agtututtot iti sango ti tiangge ni Nang Ising.  Naragsakan dagiti padak a lallaki ta pinaypayso ni Ikit ti karina.

Managparanud ni Ikit, nakunak iti nakemko, ngem bigla ketdin a nakariknaak manen iti karkarna, a kasla adda ipasimudaagna nga eksena iti masakbayan. No ania daytoy a banag, dayta ti saanko a masigurado, ngem ammok nga adda, a kas iti kinaadda ti kabalikid ti amin a banag ditoy rabaw ti daga. Managparanud ni Ikit, hu, bay-am man kadi, ta isu met ti mangparagsak kadagiti kapurokan, lalo kadagiti padak a makumikom a kumubkubukob nga agubra iti bangkag ken talon iti innem nga aldaw ken aginana met iti Domingo ken agistambay iti sanguanan ti tiangge ni Nang Ising.

Binukitkitan ni Victor ti linaon ti bay-on ni ikit nga imbaba itay ni Funtino a drayber ti traysikel a naglugananna. Dinutdotna ti maysa a katudok a binnuelos, kimmittab iti maysa nga agbubukel sana impuruak ti situtudok ken ni Olan nga agur-uray met, kimmittab met daytoy iti maysa sana impuruak met kaniak, kinittabko ti maysa a katukel ket impuruakko met ti nabatbati a maikapat a tinukel ti binuelos ken ni Kanor ket nagsasangokamin nga agkabkabukab ken mangnamnanam ti imas ken kilnet ti espesial a kankanen iti probinsia. No kastoy ngamin a kalgaw ket panagdadapil kadagiti unas ken panagaaramid met kadagiti binnuelos.

Binitbit ni ikit ti bay-onna ket nagpakadan.

Kasla di pay la mamati dagiti lallaki iti purok nga agpapulotan iti kakasla gurong nga oriles ni Ikit Banang. Ket uppat pay! Kellaat a timbog ti katayko iti panagidog ti kilawen nga oriles nga isiwsiw iti wasabi ken soy iti mugingko. Sashimi, kunam man! Ilokanokami, mannangan iti sashimi a kas kuna ni Ikit. Binandehado la ketdi ti pakaaramidan ti kilawen nga oriles a paborito ti sangapurokan. Ket dagiti ulo, bagbagis, ipus ken nagkudilan isu met ti malaokan iti pias ken sangaperper a sili a pimmasayan, imbag la nga igupen ti digona, ken pangdisimular iti ingel ti sammigel.

(Adda tuloyna)

Comments are closed.