Footer

Negosiante, nakilugan kenkuana, tinambang armado a lallaki

CANDON CITY – Pinaltogan dagiti armado a lallaki ti maysa a negosiante a nakairamanan ti nakilugan kenkuana sadiay Barangay San Nicolas ditoy siudad idi sardam ti Pebrero 10, 2014.

Kinuna ti polis a napaltogan ni Danny Etrata y Tobias, 58, businessman, ken residente ti Barangay Caburao, Santiago, Ilocos Sur ken ti nakilugan kenkuana a ni Ernesto Calindas, Jr. y Ganapin, 21, baro, usher iti pagtennisan, ken residente iti Barangay Talogtog, ditoy siudad idi agarup alas 8:30 ti nadakamat nga aldaw iti asideg ti Candon City Central School a masarakan iti Barangay San Nicolas.

Saan a nabigbig dagiti nangisayangkat iti pammaltog. Di pay met ammo ti motibo ti pammaltog.

Kinuna ti polis a kalkalpas ni Etrata a nagay-ayam iti tennis iti compound ti eskuela ket aggawiden, kaduana ni Calindas a nakiangkas iti kotsena a nangisit a Toyota Vios, idi pinaltogan dagiti tallo a suspek a mapapati a nangur-uray kenkuana iti ruar ti pagadalan.

Uray no nasugatan, nabaelan ni Etrata a pinakaskas ti luganna a nanglibas kadagiti nanggandat iti biagna sa napan iti Candon City Hospital tapno maagasan dagiti sugatna.

Nagsagrap ni Etrata iti sugat iti makannigid a paset ti bagina ken iti likudna. Nasugatan met ni Calindas iti akinngato a paset ti makannawan a takiagna.

Walo a bala ti nangabut iti makannigid a paset ti kotse ken pakairamanan ti nabuong a sarming iti batog ti drayber.

Nakasarak dagiti inbestigador iti nakapasamakan ti krimen iti tallo a kapsula a gapuanan ti cal. 45 ken maysa a deformed metal jacket a mapapati a naggapu manipud iti maysa kadagiti naiputok a bala.

Naglugan dagiti suspek iti single motor ket naglibasda iti saan nga ammo a direksion.

Agtultuloy ti panagimbestiga dagiti polis mainaig iti nasao a pammaltog.#

Comments are closed.