Footer

Vigan City, entry ti Region 1 iti national level kas LGU Best Implementer ti 4Ps

VIGAN CITY – Ti Vigan City ti mangibagi iti Rehion I para iti Best LGU Pantawid Pamilya Implementer iti intero a pagilian.

Iti panangiyalatna iti nasao a pammadayaw, imbalat ti Vigan City dagiti kinabalubalna iti sibubukel a rehion a pakairamanan ti Bacarra iti Ilocos Norte; Burgos iti La Union; ken Mangatarem iti Pangasinan.

Naammuan ti Tawid News a maysa kadagiti nangabakan ti Vigan City iti nasao a pammadayaw gapu ta isu laeng ti LGU nga addaan iti programa a Pagsapulan, Raniag iti Masakbayan, a mangipapaay kadagiti livelihood projects kas iti tulong a pagkapital para iti panagaramid iti pottery, longganisa ken bagnet, pannakaited iti sari-sari stores kadagiti marigrigat nga agindeg iti siudad a pakairamanan dagiti benepisario ti 4Ps ken dadduma pay a proyekto a makatulong iti panagbiag.

Adda pay naiwaras a 158 a traysikel ken prangkisa nga agbalor amin iti P60,000.00 kadagiti napili a resipiente.

Inlungalong ni Mayor Eva Marie S. Medina ti nasao a programa kas paset ti strategic goals ti gobierno ti siudad  tapno mapabassit ti bilang dagiti pamilia nga agbibiag iti babaen ti poverty threshold.

Idi Disiembre idi napan a tawen, inawat ti Vigan City ti gunggonana a tropeo ken cash prize a P30,000.00 kas Best LGU 4Ps Implementer in Region I sadiay San Fernando City, La Union.

Iti provincial level, awan ti kinabalubal ti Vigan City para iti nasao a pammadayaw.

Sangapulo ket innem nga LGUs ti kabalubal ti Vigan City iti national level.#

Comments are closed.