Footer

2 natay iti nagsina nga aksidente

SANTA, Ilocos Sur – Dua manen a tattao ti natay iti aksidente a nagsina a napasamak iti Bantay ken ditoy nga ili idi Pebrero 19.

Naireport iti polis iti daytoy nga aldaw a natay iti aksidente da Darwin Tapiceria y Tenorio, 20, baro, katulong iti Vigan City public market ken residente iti Barangay Lingsat, Bantay, Ilocos Sur, ken ni Cristelle Leah Mendoza y Criste, 9, Grade IV pupil ti Mabilbila Integrated School ken residente iti Sitio Cabuaan, Barangay Mabilbila Sur, Santa, Ilocos Sur.

Nasarakan ti maysa a polis ni Tapiceria a nakadalutaytay iti sirok ti kamantiris iti makannigid a paset ti provincial road iti amiananen ti rangtay iti Barangay Tay-ac, Bantay a nadigos iti bukodna a dara.

Naitaray ni Tapiceria iti Metro Vigan Cooperative Hospital ngem naideklara nga awanen ti biagna gapu kadagiti grabe a sugatna, nangruna iti rupana.

Iti panagimbestiga dagiti polis, agpaamianan ti motorsiklo a minaneho ni Tapiceria idi mapukawna ti kontrolna iti manibela ket dinungparna ti puon ti kamantiris sa manen naidungpar ti lugan iti puon ti katuday.

Nakasarak dagiti polis iti plastic bag a naglaon iti naburak a botelia ti Emperador Light iti asideg ti motorsiklo.

Kabayatanna, pimmusay ni Mendoza iti Metro Vigan Cooperative Hospital a nakaitarayanna idi agarup 9:00 ti rabii ti Pebrero 19 sumagmamano nga oras kalpasan a nadungpar ti Mazda BT50 Pick Up a minaneho ni Eldwin Que Agliam, 28, baro, field operation engineer iti Globe Telecom, iti national highway a sakup ti Mabilbila Sur, Santa.

Segun iti report, mapapati a kellaat a bimmallasiw ni Mendoza iti kalsada ket nupay nagpreno ni Que, nadungparna latta ti ubing a puon ti nakaipalladawan daytoy iti kanal iti dayaen nga abaga ti kalsada.

Intaray ni Que ti biktima iti ospital sa boluntario a simmuko iti police station ti Bantay.

Iti kaudian a report, mapapati a saanen nga agdarum pay ti pamilia ti biktima kalpasan a nakiareglo ni Que kadakuada.#