Footer

Aglaklako di rehistrado a pestisidio, abuno, natiliw

BANTAY, Ilocos Sur – Nakasuan iti panaglabsing iti PD. 1144 ti maysa a babai gaoy iti mapapati a panaglakona iti saan a nairehistro nga abono ken pestisidio.

Iti kaudian a report, nakasuanen ni Mylene Celedon Gordolan iti panaglabsing iti PD 1144 ket nai-docket ti kaso iti babaen ti CC No. 7341-V-2014.

Temporario a nawayawayaan ni Gordolan kalpasan a nagpiansa iti P30,000.00 kas imbilin ni Judge Marita A. Balloguing ti Regional Trial Court, First Judicial Region, Vigan City, Ilocos Sur.

Sakbay daytoy, idi agarup 11:10 ti aldaw ti Pebrero 17, nagpatulong iti polis-Bantay ni Ilocos Sur Provincial Officer ti Fertilizer and Pesticide Authority Reynaldo Segismundo kalpasan nga inasitgan ti maysa nga Erwin Cordolan sana intanggaya nga ideliber kenkuana ti tallo a pakete ti saan a nairehistro a Gorich fertilizer.

Nagturong dagiti polis ken ni Segismundo iti kasera ni Gordolan iti Zone 4, Bantay ngem dida nadatngan ti suspek no di ketdi ti live-in partner daytoy a ni Mylene Celedon.

Nasarakan dagiti polis iti ruar ti akin-abagatan a diding ti kasera ti dua a pakete ti Gorich fertilizer (with Double Action nga agdagsen ti kada cartoon/pakete iti 1,000 grams), ken 18 a liter-size bottles ti Thiodan pesticide.

Sinaksian dagiti barangay officials ti pannakakumpiska dagiti abono ken pestisidio sada naipan iti police station ti Bantay para iti umisu a disposision.#

 

Comments are closed.